O LA’U TALA FO’I

01 April 2016, 12:00AM

1. Matauina pea i Tala Fou tagi ua faaulu e isi sui faatutu mo le Faiga-Palota Lautele talu ai nei ni talosaga-e faasaga i isi sui faatutu-aemaise ai lava i latou na manumalo. O le vaai tino la i nei talosaga ua faaulu i le Faamasinoga-e mafuli lava i faiga solitulafono ma faiga pi’opi’o- e faapea na faatino e Sui faatutu ia ua manumalo!

O le fesili la-afai o lea Faiga Palota Lautele ua mavae atu-o faiga ia sa fai ma faatino e sui ua manumalo-o lona uiga la-e le o se mea na tupu fua-ae o mea ua uma ona fuafua lelei-ina ia mafai ai ona maua le numera e mafai ai e se Pati Tau Upufai ona pulea to’atasi le Malo o le atunuu! Afai la e maua ma faamaonia e le Faamasinoga sa faatino ia mea sese-o lona uiga la-o le manumalo o ia sui faatutu- e le’i afua mai le tausisia o le amiotonu e tusa ai ma le Tulafono.

Ae afai la e pei ona silafia e le atunuu- e anoano faiga pi’opi’o a le Malo ua uma ona faamaonia e le Pule ma Su’etusi Sili toe faamaonia atili e le Komiti a Alii Ofisa o le Palemene-ae leai se mea e tasi o faia i ai-o lona uiga la-ua matua suamalie lava lenei mea o le faimea pi’opi’o i tagata uma-talu ai-ona pau lea o le ala poo le faiga e maua ai le manumalo!

Ae tasi lona-afai nei e manumalo i le tofi faipule o le itumalo -ona o faiga pi’opi’o-ae toe o atu lagolago le faigamalo o loo i ai nei-o lona uiga la- e o’o mai lava le faavavau amene-o fai lava nei mea o faiga pi’opi’o-ma o le a matua pisia ai lava fanau ia o le a tulai mai le lumana’i e ta’ita’ia le atunuu-talu ai-o le a latou faapea mai-“Aisea e popole ai fua i mea pi’opi’o-ae matou te o mai lava ua leva ona ola talaulau ma fua tele mai le la’au  o “Faiga Pi’opi’o “na toto e le HRPP? O le a la sou taofi? 

2. Matauina i Tala Fou -o lea ua pu’e e se afioaga se pagota na sola i tua mai le Falepuipui i Tafa’igata-ma o le faaupuga o loo momoli mai ai-fai mai o lea ua sa’o le latou manava ma ua saogalemu-ona o lea ua maua le pagota amio pa’a   o Tui Samuelu.

O le faamatalaga fai mai e tolu vaiaso o fai lenei sailiga-ma o lea pagota fai na pepelo o ia e ma’i-ma o lea na ave ai i le Falema’i mo togafitiga. O lea la pagota fai mai na vaaia e tagata o Satapualu ma latou fesoota’i atu ai loa Leoleo i Faleolo-ma e taunuu mai Leoleo-ua uma ona pu’e Samuelu e tagata o le nuu. O loo falepuipui la lea pagota ona o le gaoi ma le sola so’o i tua mai le falepuipui. O lenei pagota fai mai o lona nuu o Manono-tai, Falelauniu-tai  ma Vailoa.

O le talaaga la o lenei pagota-e le o le taimi muamua lenei ua sola ese ai mai le Falepuipui. O le fesili la-o le a se faiga a le Vaega o Falepuipui ua faata’oto e taofia ai le sosola so’o i tua o nei pagota? Afai la e leai se mea o faia e taofi ai lea faafitauli-o lona uiga la-e na o le nofonofo lava le mea lea o loo fai! Poo le a foi le lelei o le Falepuipui fou lea o loo fuafua-ae a leai se gaoioiga o faia e taofi ai lea tulaga-o lona uiga la-e le o kea le Vaega o Falepuipui i le saogalemu o tagata o le atunuu! O le a sou taofi?

3. Matauina le lelei ma le matagofie o le galuega ua faatino mo le faaleleia atili o ala tetele o le atunuu-aemaise ai lava le amata mai Lepea ma faasolo atu ai lava i sisifo. Ae o le tulaga ua le malamalala ai- pe o le a tonu lava le pogai ma le faamoemoe na faatino ai lenei galuega tele ma le taugata?

O le uiga o le fesili-o le faamoemoe ‘ea ia lelei feoa’iga i ala tetele mo le atunuu-pe o le faamoemoe-ia fai ma nofoaga e fai ai tuuga-taavale e saili ai pe o le taavale a ai e saoasaoa-ae o le taavale a ai e telegese? O le mea moni e lagona ai le loto faafetai-ua matua lelei auala tau femalagaiga-ae o le tulaga e pei ona manino mai-e manatu isi-o se nofoaga lea mo tuuga-taavale; ma e mafuli tele lea manatu i avetaavale talavou ia e le o mautinoa pe ua fai ni o latou laisene avetaavale pe leai-ae pe o malamalama foi i tulafono tau feoaiga i ala tetele! A silasila foi i lea vaega o le ala-o loo i ai lava laupapa o faatonuga-ia alu lemu…….ae leai se avetaavale o kea i ai.

O le uiga la o se manatu-faamata a tupu se faalavelave tau taavale i luga o lenei ala-e na o le avetaavale faatautala ea e afaina ai-pe afaina ai ma isi avetaavale o loo tausisi i le saosaoa faatulagaina? Afai la e tuufau lenei vaega o le alatele e tau i Vaitele-leai ni Leoleo e leoleoina-o le a le mea e tulai mai?

A tulai mai se faalavelave ma afaina ai fua isi tagata-e mafai ona toe faaola mai i latou? E le faapea la e fai atu nei ona e le o iloa e le Vaega tonu o loo gafa ma feoaiga i ala tetele! Poo Leoleo poo le LTA poo ai lava! E matua leai lava se aoga o na mea uma pe a afaina se tasi talu ai le soona o o nei taavale! Afai la o silafia e le Pulega e gafa ma lenei mataupu- e le o saogalemu le atunuu femalagaa’i ona o nei faiga-o lona uiga ‘ea o le a tu’u ai pea se’ia oti se tasi? O le a sou taofi?

01 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>