Ua maua e le Malo se foa’i e $4.3 miliona

By Sarafina Sanerivi 01 May 2016, 12:00AM

Na maua e Samoa se foa’i e US$ 1.9 miliona (T$4.3 miliona ananafi mai le malo o Iapani. O lea foa’i na sainia e le Palemia o Tuilaepa Sa’ilele Malielegaoi ma le Amapasa o Iapani i Samoa, o Tuimaugaoali’i Kazumasa Shibuta i le ofisa o le Palemia.

O lea foa’i o se vaega lea o le lagolago faifai pea ua leva ona tuuina atu e le Malo o Iapani mo Samoa.E tusa ai ma se pepa o faamatalaga na tuuina mai, o lea foa’i o le a faaaoga ma le tatau ma faaaoga faapitoa mo le faatauina o oloa ma/poo auaunaga e tatau ai mo le faatinoina o atiina a’e tau Tamaoaiga ma atiina ae Lautele i le salafa o Samoa.

Fai mai Tuimaugaoalii o lea foa’i o le a faaaogaina mo mea faigaluega ma oloa e faaleleia ai auaunaga i totonu o nisi vaega o le atunuu. “O loo matou tilotilo i le faaaogaina o soo se mea faigaluega na fausia i totonu o Iapani faatasi ai ma lenei foa’i e fesoasoani e faaleleia auaunaga ua tuuina mai mo tagata o Samoa,”  o le faaaliga lea a Tuimaugaoalii i nusipepa ananafi.

O vaega e lua ua faamoemoe o le a maua lea foa’i o le Vaega Tau le Soifua Maloloina ma le Pulega o le Tinei-Mu “E tele ni talosaga ua matou maua mai le malo o Samoa ae o nei vaega e lua o loo moomia se fesoasoani tele ma ua matou faamoemoe e tali atu mo le mana’o o lo outou malo.”

O mea faigaluega Tau Fa’inifo ma ni taavale fui-mu o loo pito i luga o le lisi mo lea foa’i. E tusa ai ma le pepa o faamatalaga na tuuina mai, o le aoaoina ma isi lava auaunaga e tatau ai mo le faagaoioia o le tausiga o mea faigaluega o le a faapea foi ona aafia i lea foa’i.

“O lenei feagaiga tau le galulue faatasi o loo lagolagoina e le Tala o Tupe Faaopoopo a Iapani ma ua faalautele e le Malo o Iapani mo atunuu e pei o le Malo o Samoa e ala i le aloa’ia o ana tulafono e faasino i ai ma tulafono faatonutonu ma le vaevaeina o tupe. “Ua leva ona galulue faa-paaga Iapani ma le Malo o Samoa talu mai le 1977, ina ia matua ati a’e ia galuega tetele tau le tamaoaiga lautele i totonu o Samoa.”

Fai mai Tuimaugaoalii e tuuina mai e le malo o Iapani se tupe toetoe lava 30 miliona tala Amerika mo le malo o Samoa i tausaga uma lava.

O le isi fesootaiga tau foa’i ua faamoemoe o le a sainia ia Iulai i le va o Iapani ma Samoa e tusa ai ma Tuimaugaoalii.

By Sarafina Sanerivi 01 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>