O le tamā ia Kaleta Tanuvasa e 47 tausaga le matua le soifua o Nofoali’i ma Aufaga. 

Na maua le fa’atalatalanoaga ma le Fofoga o Samoa o aga’i atu i lona aiga i le uma mai o le fono a le Nu’u. 

“Ia o a’u e leai lava se isi vaega o lenei lalolagi ta te fia nofo ai nai lo tua nei le nu’u. 

“O tua lava ia i nu’u i tua pei o matou nei, o lo’o lelei lava mea uma, o lo’o mamalu foi pulega ona o le faiganu’u. 

“O le ala foi le ao lo’o le mafaufau lava e o se isi mea ona o lo’o lelei lava tulaga i nei filemu ma lelei mea uma. 

“E mamalu lava faigapule nu’u ma mea uma. E pei foi ona iai lenei aso, ia fa’atoa uma mai foi le fono le nu’u. E lu’itau ai lava le nu’u i mea fai ae le gata i lea o tulaga tau  atina’e i totonu o si o matou nu’u ia ma fa’aleleia ai mea o lo’o ma’anuminumi. 

Sa taua e le tama a ola mai lava se aiga i se fausaga lelei mai tuaa e ola a’e foi e manuia. 

O le olaga mativa ae fiafia o se olaga manuia. O le galue lava le mea taua. 

“Ia o lea lava o lo’o mulimulita’i ai lava i upu lelei na aumai e lo’u tamā, a le afu le muāulu ia e le ‘ai. Ia o nei lava i Samoa e pei o lena lava, a le galue ia e leiloa pe fa’afefea ona ola.

 “O lo’o tele aiga e tele ina lē tagolima ia ae leai lava se isi mea e sili atu nai lo le galue e fesoasoani ai le vaivai i le tele o taimi.

 “O nei i Samoa e sa’oloto le tele o mea, e tusa lava pe e te le faigaluega e mafai lava ona e galue i le lau’ele’ele.

 “Ua tele lava le suiga e pei ona ua i ai le toe fo’i mai ai le atunu’u, ua lelei le tele o auala e sau i tua nei ma ua so’o moli fo’i pe a fuafua atu i aso ua alu ia o lena.