Ua faamanuiaina Tu’ula

By Lanuola Tusani Tupufia 01 September 2016, 12:00AM

O le alii lea sa le mafai ona tauva ma le Palemia o Tuilaepa Sailele Malielegaoi i le Faiga-Palota Lautele ia Mati, na faamanuiaina i le Faamasinoga Faa-Itumalo ananafi. 

.Na faamaonia e lē nofosala Tu’ula Kiliri Tuitui i le fai o se ta’utinoga pepelo e faapena na ia faatinoina le faia o le monotaga mo se vaitaimi a itiiti mai o le tolu tausaga mai le aso na filifilia ai o ia.  

Na ia teena lona nofosala i moliaga tau solitulafono na faaulu e le Ofisa o le Komesina o Faiga-Palota. 

O lea na tuuina mai ai e le Alii Faamasino o le Faamasinoga Faa-Itumalo o Fepulea’i Ameperosa Roma lana faaiuga-ae le’i atoa se minute-e lagolago ai Tu’ula.

O le itu muamua, na ia faailoa atu i le Faamasinoga na te le’i maua o loo i ai se tulaga faanenefu i totonu o lea moliaga..  Na tonu ia Fepulea’i e faapea e le’i faamaonia e le Vaega o Moliaga e tusa ai ma lona tulaga e mana’omia.

“O lea ua faaleaogaina ai le moliaga, o lana faaaliga lea. O le loia a Tu’ula o Unasa Iuni Sapolu ae o le Komesina o Faiga-Palota, o Faimalomatumua Mathew Lemisio sa avea ma loia a le Ofisa o Faiga-Palota. I fafo ane o le Fale Faamasinoa, sa vaaia le fiafia o Tu’ula ma sa si’omia e le lagolao mai lona aiga ma uo. Fai mai a ia e le’i sauni o ia e fai mai soo se faamatalaga i lea taimi. 

.O lana loia o Unasa e leai sona masalomia o le sa’o atoatoa o le faaiuga a le Faamasino.  

 “E leai se faaletonu i lo’u mafaufau o lenei tulafono fou lea na fai i taimi faai’u o le tausaga talu ai o le a afaina ai lenei mataupu,” o lana faaaliga lea. “Ou te le’i faitau i le faaiuga mai le Faamasinoga ae le’i faigofie le taualumaga na uia e tusa ai ma lea mataupu. Ua ‘ou lagona e faapea o le suiga fou o le tulafono o loo tumu pea i ni faafitauli.  Ou te manatu o lenei lava tulafono na fai ua pogai ai ona lava faafitauli i totonu o le pulega.” Na toe ta’ua e Unasa sa taumafai le Komesina i le mea sili na te mafaia-ae na o ni nai mea e mafai ona e faia pe afai e i ai tulaga e vaivai ai ma malosi ai le tulafono-pe afai o i ai se malosi. 

Ina ua talosagaina mo sona manatu faaalia, fai mai le Komesina o Faiga-Palota o Faimalomatumua Matthew Lemisio  –o le latou faaiuga ina ia faaauau pea le faamasinoga ma isi –mea-ina ia tuuina atu ai i le amiotonu se avanoa e faagasolo ai.  

Mai le itu tau moliaga, fai mai Faimalo-e le o se mea e faasino i le manumalo poo le faia’ina i se faamasinoga. 

O se mea tau le tuuina atu o nei mataupu o se avanoa talafeagai i luma o le Alii Faamasino na te iloiloina e ala i le fofogaina. O lenei mataupu ma isi ua latou maua lea avanoa ma ua faatino le amiotonu. O le taunuuga, ou te manatu-e manumalo le amiotonu. 

E uiga i le suiga o le tulafono lea na molia ai Tu’ula ma isi, fai mai le Komesina –o loo faavae i luga o suiga fou na fai i le Tulafono o Faiga-Palota i le tausaga talu ai. 

O ia suiga e le’i tofotofoina muamua,” o lana faamalamalamaga lea. .“O le mea lea-o lenei mataupu ma isi ua tuuina mai ai ia i matou ni tulaga faamuamua faale-tulafono-ia o le a ta’ita’ia ai la matou galuega mo le aga’i atu i le lumana’i. Ua matou vaaia le maua mai ai o se tulaga lelei o nei mataupu.”

I taimi amata o lenei tausaga, sa faaleaogaina Tu’ula mai le tauva ma le Palemia-e le Faamasinoga Sili.

O le mataupu lea sa i luma o le Faamasinoga Sili na fesiligia ai tulaga agavaa o Tuula ma pe faamata na ia faatinoina se monotaga e pei ona manaomia e le tulafono mo se vaitaimi e tolu tausaga.

O le mataupu a le Faamasinoga Faa-Itumalo sa faatūtū i le itu pe o iloa e Tu’ula e faapea o le ta’utinoga na ia sainia-o le mea moni e sese, i le taimi na ia sainia ai.

By Lanuola Tusani Tupufia 01 September 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>