O le talitonuga o Viliamu Olive, 51 le matua o le soifua o le afio’aga o le Malie, e ala ona mativa o le le galulue.

Na ia fa’ailoa i le fofoga o Samoa e leai lava se mea e faigata pe ā tu’u i ai le loto.

“Ia o lo’o lelei lava mea uma, o nai fuala’au ‘aina  lava nei o lo’o fai ma tua i ai aua mea’ai a matua ma fanau.”  Viliamu Olive i le Fofoga o Samoa.

 “Ia e tau mai nei o lea e tau fa’amili atu nai isalaelu, ia ma isi la’au ‘aina pei o laupele e tōtō solo a aua lava le tausiga o le aiga.

“ E leai lava ni fa’afitauli se’i vagana lava o sisi e fa’aleaga ai la’au ma e leai ni fa’afitauli tele.

 “Ia e to’afa lea o lo’o a’o’oga uma i gatai (Aoga Tulaga Lua o le afio’aga).

“ Ia o lo’o i ai le ali’i (uso) o lo’o i tai e fai lana poloka i le maketi (tagata faigaluega o le aiga).

 “Ia o tupe maua o le aiga ma le fa’asoasoa a i le vaiaso, ia o isi lava taimi ua lelei ae o nisi ua fa’ale-lele ma e maua lava nai seleni mo le tausiga o le aiga.

“ Ia o tupe fa’aalu ia vagana vaega tau le ekalesia ma le nu’u  ia ma faasoasoa lelei mo mea’ai , e fa’aaoga atu fo’i nisi o fuala’au mo mea’ai.

O fuala’au o lo’o tōtō na ta’ua e Viliamu e leai se fa’amoemoega tele o le aiga e fa’atau ae o lo’o tele lava e fa’aaoga mo taumafataga o le aiga. “ Ia e faigofie atu lea, e alu ai tupe.  “Ou  te iloa o le tagata lava ia i le lē galue ae o lea ae o lea e taugofie lava (le soifuaga).

“ E ala ona mativa o le le galue, tele lava ele’ele ia ae o le le o lava e galulue fo’i lea pei o le ala lena e ala ai ona fia’a’ai isi tagata ia ma le le o lava e faigaluega. “ Ia o le taimi lenei o lo’o i ai aiga e fesoasoani mai fafo aemaise pe a o’o i taimi o fa’alavelave, ia ae o le taimi lenei o lo’o maua lava nai seleni. 

“O le tausiga o le fanau o lo’o atoatoa mea uma, pau lava le mea o le to’a’ga e galulue ae aua le inupia solo, to’a’aga e fa’aaoga ele’ele ua aumai e le Atua , aua le tausiga o aiga ma fanau aemaise o ekalesia ma nu’u.  “Ia e muamua tapena le suāti le lo’omatua ma le toeaina ia fai ai ma sa’u iputi ma tamaiti ia ona ou alu loa lea e fai a’u fe’au i le aso , velavela loa le la sau loa malolo.