Le atunu’u matagofie ua tatou ta’ua, o lo tatou aiga

By Mata’afa Keni Lesa 02 June 2016, 12:00AM

Ua mavae atu le atuvasa ua mou fo’i le taeao, ae manatua pea le taimi ma le mea na tupu ai. Po’o a lava fa’atinoga ma va’aiga matagofie sa iai, ae mau ‘ese’ese lava le atunu’u, e fua i vaega ma nofoaga sa avea ma apitaga a’o alo le atunu’u e fa’amanatu le 54 Tausaga o lona Malo Tuto’atasi. 

Se aso fo’i ina mata’ina, a’o se fa’amoemoe ina maualuga ma matagofie - ae moni ai, e fou i le va’ai, ona fa’ato’a ‘ese lea o se nofoaga e fa’atinoina ai lea fa’amoemoe, ua tele ai ma ‘ese’ese lagona e tutupu. 

E tasi lava le mea e le tatau ona natia, talu ai, o tatou uma o Samoa. Atonu e le tutusa uma o tatou lagona ma talitonuga, ma e iai fo’i mea tatou te ‘ese’ese ai mai lea taimi i lea taimi. Ae a o’o loa i mea e aupito mamae i le Samoa ao-uliuli – pei o le fa’amanatuina o le finau a tua’a mo se malo tuto’atasi, tatou te lagona fa’atasi uma le agaga o le fiafia, le mitamita ma le fa’afetai. 

A lea sa va’aia ananafi; le tu ma le aga ma lau aganu’u masani lea na matua manino i le malae i Tuana’imato na fa’atino ai le fa’amoemoe i lenei tausaga.  

E malamalama ane le taeao ananafi, ua leva ona nopia’i le afe ma afe o Samoa i o latou tulaga mo le ‘autu o le fa’amanatuga o le tuto’atasi, le savali fa’aaloalo. O le to’atele o latou sa ‘auai i le sisiga o le fua ma le savali fa’aaloalo, e ta ane le lima i le vaveao, ua leva ona nofoi i nofoaga.  

Sa matua felanulanua’i lea taeao, na tilofia ai foliga o Samoa i aso ua mavae, o Samoa o aso nei ae maise fo’i foliga e le o toe mamao ae suia iai lenei atunu’u. Mo le to’atele, o se avanoa e toe feiloa’i ai ma uo ua leva o valavala, ae maise fo’i o sui o aiga e seasea feva’aia’i. Mo nisi, o se avanoa e toe fa’alealea ai tasi ai le fu’a a le a’oga na iloa ai nanu po’o se fa’alapotopotoga fo’i e fa’ananau iai.

E mautinoa lava, e matua anoanoa’i mafuaga lelei, ua talafeauga ai lenei Aso Fa’amanatu. 

Ua matou ta’ua lea mea, ona ua tele na’ua nei tausaga ua tatou aulia e ui i le mau fa’aletonu ma fa’afitauli sa tatou fa’afeagai. Ae moni ai fo’i, e sili mamao atu tatou i Samoa nei nai lo isi atunu’u – nu’u lata mai ma nu’u mamao atu. Ae ui fo’i i ni o tatou sasisasi ma fa’aletonu, o lo’o to’amalie lava ma soifua filemu o tatou tagata, o se tulaga e na ona moemiti iai nisi i isi itu o le lalolagi.

Moni e le-iloa e le tagata mea e tutupu a-taeao pe aulia fo’i, ae tele lava le avanoa tatou te aulia ai taeao nai lo isi i le lalolagi.  O le mafuaga lea ua alagatatau ai ona matua fa’afetai i aso ta’itasi e maleifua ane ai ma fa’alogoina le nanamu manaia o fuga o la’au ma le matalasi o le ola – ae maise fo’i taimi uma e fa’amanatuina ai le tuto’atasi.

Aua e moni ai, ua soifua manuia Samoa ma fiafia ua tatau ai ona vi’ia Le Atua. 

Ua tatou manino fo’i, o tatou o tagata finau. Po’o a lu’itau ma faigata tatou te feagai, e taumafai lava i le malosi, le iloa ma le mafai e fo’ia ia fa’aletonu, ma a’o’oga mai ia vaega fa’aletonu o le soifuaga.

E le gata ua tatou ‘ae’ae le matagofie ma le saogalemu o le si’osi’omaga o Samoa, ae le o soifua fa’alagolago fo’i o tatou tagata i nisi atunu’u. E moni ai tala masani, o le manuia ma le lumana’i o Samoa, o lo’o i o tatou lava lima. E le gata ina fa’amanuiaina i o tatou ‘ele’ele ma fanua lafulemu, a ua tatou soifua saogalemu i Samoa to’amalie, e leai ni taua, ni fevaevaea’iga e maua ai le toto-masa’a e pei o isi o tatou tua’oi ma atunu’u mamao. 

E le gata i lea, o le tatou aganu’u fa’aaloalo, le alofa ma le va-fealoa’i ae maise o talitonuga fa’aKerisiano ua mausali ai ma tumau si o tatou nei atunu’u. O vaega ia e matua mamao ai lava Samoa mai isi atunu’u o le lalolagi.

Liliu ane i tulaga tau-A’oga, e matua va-va-mamao lava tatou ma le lalolagi. O lo’o fa’ato’ateleina pea tama-fanau a Samoa e fa’au’u mai iunivesete ma a’oga maualuluga i so’o se atunu’u o le lalolagi, i fa’ailoga aupito maualuluga i le lalolagi.

A’o ai a le mitamita i ia mea? Ma ua tatau ai lava ona tatou alo fa’atasi ai e fa’amanatu fiafia ia ‘ausaga uma. 

Ae le o se tulaga tatou te so’ona mitamita ai Samoa. Ae ao fo’i ona talia ma malamalama, e iai fo’i fa’aletonu i parataiso nei; fa’aletonu e manatu, e ao ona fa’amuamua i taimi uma. 

Ioe, o se lagona matua matagofie tele pe a talitonu ua fa’amanuina ae mautinoa lava, e tele se galuega  a ta’ita’i o le atunu’u e ao ona fai.

E aofia ai le faia o ni fofo i fa’afitauli o le ‘aisi i nofoaga faitele, o le mativa ma le le-tagolima, o le fa’afaigaluegaina o fanau laiti, o le toso-teine ma uiga mataga e faia i le itupa-vaivai, o fuala’au fa’asaina, sauaga fa’asaga i tina ma fanau, o le gaoi ma le faomea, o le sosolo fa’aafi o fa’ama’i le-pipisi ma isi anoano.

Manatu alofa i nai fanau laiti, tamaiti ma teineiti o lo’o feoa’i solo i po ma oloa e fa’atau, i aso ta’itasi. Sa tatau ona iai nei fanau i nei nofoaga fa’apea? Ua le-alolofa o latou matua ua saga tutuli ai e fa’atau oloa pe afai ua leai lava se isi ‘auala e maua ai se tupe e tausi ai ma fa’aa’o’oga fanau?  

O tatou lava o se atunu’u manuia ma sologa lelei, ona o le to’atele o tama-fanau ma Samoa ao-uliuli ua ‘ausia tulaga lelei ma maualuluga. Ae susu’e loa le laualuga o le soifuaga i Samoa nei, maua sa’o loa fa’aletonu uma ua ta’ua lea ua fa’asolo ina leaga tele ua alagatatau ai lava ona fai iai o se fofo e fo’ia ma fa’amuta ai loa. 

O le a sou finagalo? Ia manuia tele Aso Malolo o le Tuto’atasi Samoa, ma ia fa’amanuia Le Atua!

 

(Fa’aliliu e Maiava)


By Mata’afa Keni Lesa 02 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>