Toe manatu tasi...Lē-fiafia i Lo’u Tagata

02 August 2016, 12:00AM

Toe mafaufau tasi lava… Ua fai si leva - ‘ou te manatua pea - lo’u le fiafia, ia te a’u lava ia. Se mau mea sa talotalo ma mo’omo’o iai ma fa’apea: ‘E, ma’umau e, pe ‘ana ‘ou umī; ma’umau pe ‘ana o’u iloa ‘inisinia ma mafai ai ona fa’aleleia le tele o mea.

Ae iai lava i si mea e sili atu le ogaoga ma taua ia te a’u. Te talotalo, ma’umau e, pe ana o a’u o se tamaloa ma se tamā lelei. E iai lava vaega o le soifuaga nei, e fa’ananau ai lava e avea ma fa’ata’ita’iga lelei i si a’u fanau. E mo’omo’o, ma’umau e, pe ‘ana lava la’u onosa’i mo nai tamaiti. Ma’umau e, pe ‘ana mafai ona toe fa’afo’i mai a’u ‘upu fa’atiga na lalafo i ai, a o le fa’alavelave, ua lē toe mafai. 

Ae le-na o o’u tiute-fa’aTamaloa e fai le to’alua ma le fanau e popole iai. Te fa’anoanoa fo’i ona o a’u o se atali’i, o a’u o se uso, o se tagata faigaluega, o se uo a’o se tagata-ola fo’i. Ua toe mafaufau i le aso na ‘ou fanau mai ai, ma le meaalofa na tu’uina mai, o le soifuaga atoa e ola manuia ai – le meaalofa na tu’uina mai mo tatou uma, i le taimi na tatou fananau ai. Sa ‘ou mafaufau i le tulaga ou te ono o’o iai. O ‘auala ‘ese’ese e ono fa’aleleia ai lo’u tagata, lo’u mafaufau, o o’u so’otaga ma le mafutaga ma isi, fa’apea le fiafia sa ‘ou le fa’aali atu pe avatu i isi tagata, ona sa le fa’aaogaina tatau ma ola i le mea e tatau ma gafatia e lo’u malosi. 

A silasila toto’a a iai, o le mea moni, e iai lava taimi, tatou te matua le-fiafia ai lava iā tatou. E iai lava taimi tatou te iloa, e le’i o’o i le maualuga ma le tulaga aupito  lelei e tatau ona tatou iai, pe soifua fo’i i le olaga e tatau ma onomea. Ae fa’afefea ona tatou iloa uma ia mea? O fea e sau ai le lē-fiafia lea?

Atonu e mafai ona fa’apea nisi, ona ua leai so tatou talitonuga i o tatou lava tagata ta’ito’atasi ma tatou le talia ai le tulaga ua tatou iai i le taimi nei. Ae le mafai ai lava ona fa’amatalaina ai le mea moni – ua tatou le-soifua ma ola i le soifuaga tonu sa tatau ona tatou ola ai. O le tali malamalama lena, ua tatou taufai sese uma, ua tatou fai mea sesē ma lē ‘ausia ai le mea tonu sa tatau ona fai. O le fa’anoanoaga lea i o tatou tagata, ona o lo tatou mana’o-vale fa’aleTagata, ia so’ona fa’ananau ia avea tatou ma tagata e manana’o iai. A o le tala manaia la: O le fa’atasi mai ma le fesoasoani mai a Le Atua Foafoa, o le a avea ai a’u ma tagata e tatau ona iai.”     

O le tulaga moni lea, se’i vagana ua tatou ō i Lē Na faia i tatou ma alofa moni mai i taimi uma, o le a fa’aauau pea ona tatou ola le-fiafia ai ma leai se fa’amoemoe ma le maua ai le olaga sa tu’uina mai tatou te ola ma fiafia ai. Ae le’i tuai tele! Mo lenei taimi ma taimi uma, tatalo ia Iesu e fa’amagalo ‘Oe mo le ola pea i ou ala sese, ma Ia fa’atonu mai e Ia lou tagata atoa. Ona pau lea o le ‘auala e mafai ai ona toe amata lelei lou olaga; le taimi la lea, pe a pulea mai e Ia lou ola, Na te amata ona toe liua ‘Oe e avea ma tagata fou – le tagata na Ia faia ‘Oe ia iai. Toe mafaufau tasi lava….

(Fa’aliliu e Maiava)

02 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>