O le vai o se tasi lea o manaoga taua i lo tatou olaga i aso uma ma o se mafuaaga foi lena o loo taumafai ai le toatele o tagata e maua a le suavai tumau.

Ua avea ma se tulaga e mafatia ai le toatele ma o loo lagona e Faaiu Setali Saulo lenei mafatiaga.

E 34 le matua o lona soifua ma o loo manatu faaalia i le Fofoga o Samoa, o se fesoasoani mo le vai mo lona ia aiga.

Sa taua e Faaiu, o taimi timuga o se taimi lea mo faamanuiaga mo latou aua o se taimi lea e sefe ai a latou vai.

“O lea la e vaai atu, e fai ai sina umi o le vaitaimi la loua tatou oo mai ai nei,” o lana tala mai lea i le Fofoga o Samoa.

“A leai a la se vai e maua ona matou agai atu lea i le Lotu Mamona aua se fesoasoani aua e tele na o tagata e utu vai mai o le la pito.

“E tusa lava pe faigata matou te taumafai pea ma si au fanau e fai lauga vai aua e manaomia lava i aso uma lava.

Sa taua e Faaiu o ia ma lona aiga ua fai sina leva ona latou nonofo i le la itu ma o se mafatiaga lava lea aua e le au atu le vai a le malo ia tei latou.

“E tutusa uma a matou ma aiga ia iinei aua e le oo mai le tosoina o le vai a le malo ia matou.

“O lesi foi mea, e totogi foi le taavale lea e lau ai a matou paelo vai.

“Ia o se mafuaaga lena o loo matou manaomia ai se fesoasoani aua le tane vai aua e iai le matou tane vai, ae o le ituaiga laitiiti foi lea e uma a vai e lei taitai le aso.

“O lau fanau foi o loo nofo aooga i Salamumu aua o loo lelei le suavai i o ae o matou nei e leai se mea e faalagolago ai tamaiti pea le maua se vai mo se taimi vave.”

 A e fia fesoasoani ia Faaiu Setali Saulo mo se tane vai foai, faamolemole faafesootai o ia i le numera 7244997.