Lauga - “O Suli o le Mālo”

Tusia Rev. Petaia Setu ,

237 Hits

Rev. Petaia Setu

Rev. Petaia Setu

E lē tauilo suli o se aiga. Poo fea lava e fealuai ai le suli e lagona lava e le toto lona faasinomaga ma lona tupuaga. Ae ao lava foi ona manino, e lē suli uma tagata. I la tatou faa Samoa, e iai suli ua ta’ua o suli sa’otā, e iai suli tupolo, faapea foi suli tupolata.E eseese. O suli tupolata,  o tino ma aano poo suli moni lava ia o se aiga. E iai i le saofaiga, e saofia foi sona leo i le faatōfāla’iga. E amana’ia sona finagalo i pulega faa suli i mea tau fanua ma suafa o le aiga. A o luga o le Mauga na manino ai ma lologo le lalolagi uma i le saunoaga paia a le sa’o o le Mālō o le Atua.

‘Amuia ē loto maulalo, auā e ō latou le Malo o le lagi. Amuia ē agamalu, auā e fai mo latou tofi le nuu. Amuia e loto mamā; Amuia ē faatupuina le filemū; Amuia ē sauāina ona o le amiotonu; auā latou te iloa atu le Atua; auā e ta’ua i latou o atalii o le Atua; auā e ō latou le Malo o le lagi. O Suli na o le Malo e faavavau.

E lē tau faama’itēa le suli moni o le Malo o le Atua. E iloa i le amio. Tatala lava le lauga a Iesu i ata e taialaina ai le tagta i le malo o lona Tamā. Amata lava i faamanuiaga o le suli. Faamanuiaga o le amio ua pulea ma taitaiina e le Agaga o le Atua. Taunuuga lelei o le tagata ua faauuina e le Agaga o le Alii. Ua le gata ina faalogo i le Atua, ae ua savali ma ola ai. Ua ia faatinoina le lauga a le Alii i lona olaga i lona aiga, i lona nuu, i lana galuega, aoga, ma lona olaga o aso uma.

O le tulaga aupito sili lea ona maulalo o le soifuaga faa tagata soifua, lea ua faataoto mai ai e Iesu le ta’iala e ta’usuliina ai oe ma a’u i lona malo. O lalō, lalō lava i le ituaiga olaga o loo ta’ua e tatou i le vaaiga faale tagata, o le palaai. E matuā tuu faafeagai ma lagona faa Samoa, e le fia toilalo (Mata 5:38) E loto maulalo la faapefea? O ā fua o le agamalu pe a fai o siisii pea lăfoga ma saunoaga i le tōfa ma le faautaga fetāla’i? E filemū lou aiga pe a lafulafuā lou loto? Tou te fematea’i ma felamata’i pe afai e mamā le loto?

Ua mafai ona e faatoafilemuina lou loto pe a satia oe poo sou atalii/afafine e ou tuaoi poo nisi tagata? Sole, e ese le faigata. E faigata. E le tutupu fua taua i atunuu i fafo. E a? E le fia toilalo. E le tumu tumu fua foi o tatou fale faamasino o fanua ma suafa. E a? E lē fia toilalo! Pe misa i mafaufauga pe fetaua’i i upu le palemene, o le tali lava e tasi. E lē fia toilalo. E faigata ona tatou ō i lalō i le mea o loo a’oa’o mai ai Iesu. A o tatou e taulagi lava le atunuu lotu! Lotu la faapefea? O le ā le ituaiga lotu o loo faamamafa ai le taulagiga? O faigata ia Samoa o loo lapelapea ai le fai ma suli moni o le malo. 

O Samoa o le atunuu kerisiano e pei ona iloa ai e le lalolagi. Ioe, e kerisiano tagata uma; ae le o tagata uma e suli i le iuga. Fai mai Iesu i le faaiuga o lana lauga, “na o lē na te faia le finagalo o lo’u Tamā o i le lagi” (Mataio 7:21). Uso e, Samoa, o suli o le malo o le Atua e le o ni suli tau suafa, na ona faa-maliuliu ma faatatafa. E le o ni suli tau upu ma faamatalaga, a o le faatinoga ma le auaunaga. O le finagalo o le Atua o loo ua fai ma ‘auga o le lauga i le Mauga, ia muamua ona saili le malo o le Atua ma lana amiotonu (Mtt.6:33) O auala e saili ai, ia maua le loto maulalo.

Ia ia te oe le loto faamagalo. Ia pulea lou loto e le agamalu ma le filemu o le Alii. (Kolose 3:15) Ia e onosai i mea e tiga ai (2 Timo.4:5). Ia ‘alo ese ma amio a lenei lalolagi, a ia liliuina i le toe fuataiina o outou loto, ma ia outou iloa le finagalo o le Atua, o mea ua lelei ma atoatoa (Roma.12:2). Samoa e, o le fai ma suli o le malo o le Atua e le faigofie.

O le logomalie ia o upu o le lauga a Iesu i la tatou faalogo ma la tatou faitau. A o le faigata ia ona faatulaga ma tau faatonu iai lou soifua ma lo tatou ola. E māfua i se a? O le tali, tatou te le fia ola ai i sea olaga toilalo o loo faataoto mai ai le lauga. O le luma i le vaaiga faaletagata. Ae e te iloa, o le saoaluma lea i le malo o le lagi. E le mafai ona tatou iloa ona o loo tausili lava tatou i o tatou manatu ma o tatou manaoga faaletagata. Fai mai Iesu, “Ai se fia mulimuli mai ia te a’u, aua ne’i usiusitai o ia ia te ia.......”

O le faafitauli, e te fia alu ia Iesu, ae ua sili lou alofa i lau sikaleti, i lau pia, i au pepa bingo, i taaa’iga a au uō ma au kalapu faale lalolagi nei. Ua e usitai i ou tuinanau ona e le iloa ai lea o sau fanau. Ua e soli feagaiga ai i luma o le Atua Silisili Ese. Ua e finau maua’i ai i mea ua lē o ni au mea. E faamamapo lou kerisiano, a o upu ma amioga ua matuā le ‘ano’ano! O ‘e iloa e toatele atu suli a Satani o i le lalolagi? Faalogo la i amio ma foliga ia ua faailoa mai e Paulo pe e te le o suli ai ma oe i le alii o le lalolagi.

O le mulilua, o le faitaaga, o le amio leaga, o le mātāitu, o le ifo i tupua, o le fai togafiti faataulāitu, o le feitagai, o le femisaai, o le losilosi vale, o le lotoa, o le finauvale, o fevaevaeaiga, o maseiga, o le matau’a, o le fasioti tagata, o le onaga, o le poula ma mea faapena, ou te mua’i ta’u atu nei ia te outou pei ona ou fai atu anamua, o ē faia mea faapena, e lē fai le malo o le Atua mo latou tofi. (Kalatia 5:19-21). Afai la e misi atoa oe ma le malo o le Atua, Talofa e, o fea la e te suli ai? 

O la Paulo i le ekalesia i Kalatia, “ A o ē o ia Keriso, ua faasatauroina e i latou le tino ma ona mana’o, ma ona tuinanau” (Mareko.8:34) O le olaga lena faa-suli o le Malo o Keriso. O lalō i le olaga mafo’efo’e ma masofasofa. O le siomaga le taualoa ma le amusia. E inosia ma sauāina le suli ona o le Suli Tupolata. Ia, popole fua. Fai mai Iesu, “e ō latou le Malo o le lagi”. Oka, se matagofie o le Alii! E ā la lea taunuuga?

Uso e, oe le tagata le mautonu, poo e faalogo mai ea ma lagona i lou loto lenei feau? Faamata e le’o oe le isi suli leiloa? Faalogo foi i le suli sa taa ma ola faasausili ae na lagona i le loto o ia o le suli. “ O le a a’u tulai ma alu i lo’u tamā, ou te fai atu ia te ia, ‘Lo’u tama e, ua ou agasala i Lē o i le lagi atoa ma ou luma’ (Luka.15:18). E le tauilo le suli moni. E iloa ile faauuga a le Atua ua i lou loto ma lau amio.

Samoa, o le Suli Tupolata na te iloa lona faasinomaga. E malamalama i ona tupuaga. Fai mai Iesu, “Ia atoatoa ona lelei o la outou amio, e pei o lo outou Tamā o i le lagi e atoatoa ona lelei o ia”. (Mataio 5:48) O muagagana a le atunuu, e soo le moa sope i le moa sope. O la le Atua ia Mose ma le fanauga a Isaraelu, “Ia paia outou; auā o a’u o Ieova lo outou Atua, e paia lava a’u” (Levi.19:2).

Samoa pele e, o foliga ma uiga na o le Malo o le Atua ma ona tagata. O le ola faapaiaina. O le ola lea ua lelei, ma mālie, ma atoatoa i le Atua. (Roma.12:2). Ola faasuli moni. Ola faa Keriso. Like father, like son. Ae afai e le suli tupolata oe o le Malo o le lagi, pe se suli la oe o ai?

 

Amene

7737063/7783782

© Samoa Observer 2016

Developed by Samoa Observer in Apia