“Ua tumu le fua”- Enough is enough

03 January 2016, 12:00AM

Tatou te faafetaia pea le alofa ma le agalelei o le Atua ona ua tatou aulia manuia mai lenei Aso Sa-o le aso o Tapuaiga faitele a Samoa i soo se Fata Faitaulaga- e faafetaia ai lona Alofa ma lona Agalelei ia i tatou uma-ua tatou aulia manuia mai ai lenei Aso Sa.

E ui foi ina le ‘asa se aso ma mala e tutupu mai aemaise ai le maliu ma le oti ua motusia ai mafutaga pele ma matua, uso, tuafafine aemaise ai o le fanau pele-ae faafetai na te le o tuua tatou ia saga faanoanoa pea ma mafatia-ae ua na tafi ese loimata maligi o faanoanoaga e ala i Lana faamafanafanaga.!

O le mea lea- ia ia te Ia pea e Toatasi- le Tama-le Alo ma le Agaga Paia- le viiga ma le faaneetaga e amata atu nei se’ia o’o i le faavavau-Amene!.

Ia-alo maia-o le tatou talanoaga masani foi lenei ma le ‘aufaitau o lenei Nusipepa i lenei tausaga fou-aemaise ai-o le Mamalu o le atunuu o loo fiafia pea e fai tau i lenei tusitusiga!

Ia-o lena ua tusia matamata tetele i luga le ulutala o lenei talanoaga-ae tatau lava ona toe faamanatu atu pea le uiga moni o lenei talanoa.

E le o se tuua’ia o se tasi; e le o se tau faaleaga foi-ma e le o se faaoloataua foi-se’ia vagana ai lava le fia faailoa atu o mea o loo tutupu i totonu o lo tatou atunuu mo lo outou silafia- e le gata ina tusa ai ma la outou aia tatau e tatau ai ona outou silafia ia mea-ae ia tusa ai foi ma tiute tauave o nusipepa uma o le lalolagi- “o le faailoa atu lea o mea o loo tutupu; o ai ua mafua ai; ae o le itu e sili ona taua-‘o le a se faiga  a le Malo e tatau ona fai i ai!

O lena ua i luga le ulutala o le tatou talanoaga-ma e i ai lou faamoemoe-o se ulutala ua sili ona manino ma malamalama!

Ia o lea ua tatou toe alo atu i le Faiga-Palota i le Tausaga Fou. O lea foi ua silasila manino le atunuu i le toatele o sui faatutu mo lea faiga-palota; e le gata i le itupa o alii-ae faapea foi le itupa o tamaitai.

Ua mautinoa foi e le atunuu Vaega Faa-Upufai o le a lagolagoina e ia Sui ua faatutu mai mo le Faiga-Palota o loo loma nei!

A tatou tilotilo la i Vaega Faa-Upufai aloa’ia o loo i ai nei –e na o le lua lava. O le HRPP lea ua valu paeaiga soso’o o latou faafoeina le Malo o Samoa-ma le Itu Agai poo le Tautua Samoa Party-ona pau lea. Afai la ua lata i le 40 tausaga o faafoe e le HRPP le Malo o Samoa- ae o lea ua toe fotua’i mai le isi faiga-palota-ma o loo faamoemoe foi le HRPP e toe fo’i mai e toe faafoe le Malo o le atunuu- o le taimi la lenei e tatau ai ona tatou matua nonofo lelei i lalo ma mafaufau loloto.

Muamua- o a ni mea lelei ua fai e le faigamalo a le HRPP mo le atunuu!  O le upu moni- e tele mea ua fai e le HRPP mo le atunuu-ma atonu o loo silafia e le atunuu, ae tasi lona-poo a lava na mea lelei-o le pinefaamau lava poo le faamaoniga-“o le tulaga lea o loo i ai le atunuu i le taimi nei.!

O lona uiga- pe o manuia pe leai! A toe faaupu-pe o maua e tagata uma mea e tatau ona latou maua e tausi o latou soifua-aemaise ai o avanoa eseese i soo se fesoasoani! O lena foi manuia- e faasino i tagata uma lava i Upolu ma Savaii-ae le na o se vaega o tagata!

O tali la o na fesili- e tatau ona outou silafia –ona fai fuafua lea i ai o lau palota! E le o se faatonuga-ae o se tuu-a-lalo; aua e manuia oe ma lou aiga ma tagata uma o le itumalo ma Samoa atoa- pe a tonu ma sa’o sui tatou te palota i ai. 

A tatou tilotilo la i le HRPP-o lea ua savalia le 40 tausaga o ona pulea le Malo le atunuu! O le fesili la-o manuia ai oe ma lou aiga ma lou nuu ma lou itumalo?

Ia o le tala i le faiga-malo a le HRPP-e leai se mea o lilo ia te oe Samoa!

E le toe tau faamatala atu ia mea e pei o le faatauina atu o Tusi Folau Samoa ma Sitiseni i tagata Saina ma le fasiotia o le isi Minisita! E le toe tau faailoa atu foi le anoano o faiga pi’opi’o a le Malo e pei ona lipotia e le Pule ma Su’etusi Sili, aemaise ai lava faiga pi’opi’o na fai i le SLC e le Minisita muamua o Tupe, ae musu le Palemia e tuuina atu lea mataupu i le faamasinoga e saili ai le amiotonu ma le isi anoano e pei o taavale taugata ma le faiga o konekarate!

Ae o le uiga o se faamatalaga- afai  o e silafia Samoa o loo e manuia-e faitalia lava outou! Ae afai o tatou matitiva ma feoa’i solo fanau i le ao ma le po e tau faatau atu oloa i luga o ala tetele-pule lava oe!

Afai ua faateteleina le gaoi ma le talepe fale ona o le mativa-pule lava outou! Afai foi ua sauaina fua tina ma tamaitai- e tatau lava ona i ai se pogai. Afai foi ua faato’ateleina tagata aisi i totonu o le taulaga i aso uma-pule lava oe.

Ae o le fesili taua lava-e te fiafia pea e lagolagoina nei faiga piopio e fai e le Malo?

E te lagolagoina taupulepulega leaga a tagata faigaluega o le Malo! O le a la sou taofi? Ua lava ia mea leaga ma le inosia pea leai? O maua se manuia o le atunuu i nei mea leaga uma? E te manatu la ua tatau ona lava ia mea leaga pe leai?

Afai la e te manatu ua lava ma totoe ia mea leaga-E te talitonu la pe leai i la matou mau- ua “Tumu le Fua” pe leai?  Ia manatua la-afai ua tumu le Fua i mea leaga-o ai la ia e sili ona aafia ai? O le tali o tatou lava!

Afai la e te le talitonu-o lena e totogi lau lafoga, totogi le lafoga o taumafa, tipi lou totogi mo le taui o faalavelave faafuase’i ae leai sou manuia e maua ai- o lena e te totogiina le tau o le suauu e gaosi ai le eletise ae totogi lava le pili o lou moli eletise. O lea e totogi e le atunu le anoano o aitalafu a le Malo i fafo ua pa’ia le Piliona!

E te manatu la ua tumu fua pe lei taitai ona tumu! O le manatu la o lenei tusitusiga-afai ua tumu le Fua i faiga pi’opi’o ma mea leaga a le Malo-o le talosaga la i le Malo faamolemole ia –“UA TUMU LE FUA” o lona uiga- a ua lava-ona lava lea o na mea leaga! Ia manuia tele le Aso Sa muamua o le 2016 Samoa- ma ia faamanuia atu le Atua! 

03 January 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>