O le ‘Ioe’ e ātu ai le mafaufau

By Fa’aliliu e Maiava 04 May 2016, 12:00AM

Toe mafaufau tasi lava…O ‘Oe o se tagata “e ioe” lava i taimi uma? E masani ona e tali ‘ioe’ i so’o se tagata e mana’omia sau fesoasoani i so’o se mea lava?

O nisi o tatou, e le taitai mafai ona tali “leai” i se tagata. A o le fa’alavelave o lou “ioe” po’o lou tali “ua lelei”, e masani lava ona o-mai fa’atasi ai ma le fa’atigā-ulu e ātu ai fo’i le mafaufau – e le gata ia tatou lava, ae fa’apena fo’i i o tatou aiga.

O le tele o taimi e te ioe ai i se tagata, e pei ai lava o lo’o e tali atu ‘leai’ i se tasi o au uo po’o lau fanau fo’i. 

Moni e tatau ona tatou agalelei ma alolofa atu, i isi o lo’o mo’omia moni le fesoasoani. Ae tatau fo’i ona tatou iloa, fua le fesoasoani e mafai ona tatou tu’uina atu, e ‘alofia ai le “ioe” i so’o se tagata e fesiligia se fesoasoani. A fa’amasani e tali ‘leai’ i nisi taimi, e mautinoa o lou “ioe” lava lena i ou tiute ma faiva mo lou lava aiga, ma fesoasoani tele ai, e tu’umamaina le ātu o lou mafaufau.

Manatua, e to’atasi lava na o ‘Oe, le tamā po’o le tinā fo’i o lau fanau; a lē faia la lau galuega - o le a’oa’o, tausi ma alofa iai – e mautinoa, e leai a se isi e faia lena mea lelei. Ona vevesi ai fua lea o le tou aiga ma lē-maua ai se to’afilemu, ma se aiga fiafia. 

So’o se taimi lava la e fai atu ai se tasi mo se fesoasoani po’o se isi lava mea mai ia ‘Oe, e ao lava ona silasila toto’a i le talosaga, fefulisa’i le tofa ma fai le fa’atatau, pe o le fa’atinoga o le mana’o, o le fesoasoani tonu lea mo latou.

Silasila fo’i, e iai taimi a le-tu’ua latou e feagai ma o latou lava fa’afitauli, o lona uiga, tatou te le o fesoasoani moni iai. Taumafai e tu’u le avanoa e fa’atino ai lava e latou, mea e manuia ai o latou lava olaga, a leai, o le a fa’aauau ai lava ona tatou faia galuega mo latou. O le avea la ma “tagata-ioe” i taimi uma, e le o se mea amiotonu lea e le-iloa ai fo’i se uo fa’amaoni. 

O se isi taimi, e toe fai atu ai se tasi i se mea e te faia mo latou, ‘aua le tali vave iai. Fai iai, e te le o mautinoa a o le a maua atu se tali i se isi taimi, pe a mae’a ona e mua’i siakia fuafuaga ma fa’atatauga a lou lava aiga.

Atonu e mafai ona e fesoasoani iai, i se isi taimi, pe a toe fai atu. A o  le mea masani lava lea a tagata fa’apea, o le fa’afetai atu mo lau fesoasoani. 

O fa’aauau pea lava la le ātu o lou mafaufau ma ola o’ono lou aiga ona o lou “ioe” so’o i isi tagata? O e silafia, ua tele atu ou taimi ma lou malosi alu i le fesoasoani i isi, ae o lo’o tiga pea lou aiga lea e te fa’atauagavale iai, i ou tiute-fai, e tausi lelei ai ma fesoasoani ia latou.

Tatalo nei ia Iesu, e fesoasoani atu, e a’oa’o lou mafaufau ina ia poto au fa’ai’uga fai ma so’ia ai le toe so’ona ‘ioe’ atu i tagata, atoa fo’i ma taimi e tatau ai ona e tali atu ai “leai” Toe mafaufau tasi lava…                                                                   

By Fa’aliliu e Maiava 04 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>