Tautua ma fa’atino ae le’o na’o upu

By Aruna Lolani 03 May 2017, 12:00AM

A fa’apea e avea oe ma pulenu’u, e tatau ona e iloa le ala e te uia, e tatau ona e savalia au upu e fai ma e tatau fo’i ona e fa’atino i galuega o lo’o e mana’omia e fa’ata’ita’i uma e tagata, aua o se ta’ita’i lelei, e le fa’apea na’o le igoa o lona tofi e fa’aalia ae o a fo’i ni tu ma ni aga e tatau ona e fai mo tagata.

Sa fa’alia e lenei tama ia Lepua Tauapa’i i lana fa’atalatalanoaga ma le Fofoga o Samoa le taua o le fa’aaogaina tatau o lou tofi.

“Ua fai lava sina umi ona ou pulenu’u ma o le masina nei e uma ai lo’u tofi, ma o lea la e fa’aaoga tatau le taimi o totoe e fa’amalosia ai nisi suiga e lelei mo le nu’u,” o lana tala lea.

O Tauapa’i e 59 le matua o lona soifua mai le nu’u o Falefa,  ma sa ia feagai ai ma le sasaina o le vaomatua ina ua o’o atu ai le savali a le Fofoga o Samoa.

“E tele a matou asiasiga e fai i totonu o le nu’u aua le lelei o le tagata.

“Ia na ua outou silasila mai, fa’ato’a uma atu i le vaiaso tua atu a matou asiasiaga ‘aai, sa fa’atautava ai nu’u po’o ai e sili atu le mama o latou fanua, e fai a la lea asiasiga i masina uma.

“Ou te asiasi fo’i i fa’ato’aga a le nu’u po’o lelei le va’aiga ma fua lelei meatoto pei o fa’i, o talo ma niu. 

“O le matou nu’u ua le toe fa’atauina atu mea toto, aua sa ou manatu ifo e sili a le tu’u e tau atia’e tagata o le matou nu’u.

Sa ta’ua fo’i e Tauapa’i e fai fo’i ni asiasiga i aiga e ala lea i le fanau, po’o ave i le a’oga pe leai.

“O se mataupu ua fa’amalosia ma so’o se aiga e maua latou tamaiti ua misi se a’oga, e fa’asalaina i latou.

“E sili atu ai lo’u va’ai i le fanau o a’o’oga nai lo le o e fai fe’au.

“O lo’o matou taumafai fo’i e fautua atu i le au tupulaga ua le toe a’o’oga po’o le faigaluega fo’i a le nu’u e fa’atumu a latou pepa o le kuota ma o atu ai i atunu’u i fafo ina ia maua ni a latou galuega lelei.

“Ua tele lava suiga lelei i totonu o le matou nu’u. 

By Aruna Lolani 03 May 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>