Toe faaopoopo le taimi e nofo ai se Pagota i le falepuipui

By Pai Mulitalo Ale 03 June 2016, 12:00AM

O se pagota mata’utia ona o le sola ese soo mai le falepuipui, o Tui Samuelu, o le a toe faaopoopo lona taimi –e pagatia ai i le Falepuipui i Tafa’igata.

O tala atu ananafi, na tula’i ai o ia i totonu o le Faamasinoga Sili-i luma o le Tamaitai Faamasino o Mata Tuatagaloa mo le tuuina atu o lona faasalga ona o le faomea, gaoi ma le sola ese so’o mai le falepuipui.

E tusa ai ma le otootoga o mea moni, o lea pagota e 21 tausaga le matua- na ia faia ni fuafuaga ma isi pagota- ina ia sosola ese e saili se fale e talepa ma gaoi.

O le aso 29 o Iuni 2016, na o ese ai Samuelu ma isi pagota ae tuua le falepuipui- ma o le fale muamua na latou taunuu i ai i Ululoloa na latou talepe ma ulufia. O le itu tagi o se alii faipisinisi matua lea e 84 tausaga le matua.

Sa tofafā o ia ma si ona faletua i lo la fale ma o le taimi lea na ulufia ai e lē ua tuua’ia ma ana uo lea fale-i le tuneva o le po. Na ave e Samuelu se Samsung Tablet o lona tau e $1,000, tinoitupe e $350 ma molī e tusa le tau ma le $300.

O le tau atoa o ia meatotino uma na latou gaoia sa $2,250. Ina ua iloa e lē ua tagi le mea ua tupu, na tu’i e se tasi o paaga a Samuelu- o ia –ona latou tuua loa lea o le fale. Ina ua tulai o ia i luma o le Faamasinoga, sa fesiligia e le Tamaitai Faamasino o Tuatagaloa lē ua molia pe mana’o e sui lona olaga.

 “Ailoga o i ai sou manatu i se matua suiga o lou olaga,” o le faaaliga lea a le tamaitai faamasino. “Ua aga’i ina e matua masani i lenei ituaiga o olaga ma o loo faaauau pea ona e faia-talu ai- na o Tafa’igata lava le nofoaga mo tagata e pei o oe.”

Na tu’u atu e le Faamasinoga le lua tausaga e avea ma laasaga amata mo le moliaga tau le gaoi.  I le faaiuga, na toe tuuina atu ia te ia le 6 masina mo le gaoi ma le 4 masina mo le sola i tua mai le falepuipui.

O ia faasalaga uma o le faatinoina i le taimi nei. Na faamanino lelei e le Tama’ita’i Faamasino o Tuatagaloa e faapea o le 21 masina o le a faaopoopo i le taimi o lona faasalaga o loo tuli nei i Tafaigata.

By Pai Mulitalo Ale 03 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>