Fanau le Pepe o le Tausasaga Fou
E ta tonu lava le 12 i le vaeluaga o le 2017/2018 ae tu’u’ese’eseina loa le tinā i a Chara Fatu ma lana pepe teine o Tiara New Year Fatu i le falema’i i Moto’otua.
O le la pepe muamua fo’i lea ma le tamā o le aiga.
Na saunoa le Foma’i Fa’atosaga i a Tiara Tu’ulua e ono avea o ia ma pepe muamua o le tausaga i le lalolagi atoa.
“Ia e pei o lea lava le tulaga o i ai, ona e ta tonu le 12 ae fafo uma loa lona tino,” o lana saunoaga mai lea.
“O le matua’i aulelei lava o pepe, ma o lo’o malolosi uma fo’i ma si ona tinā, e leai lava ma se faigata na i ai o ia i le taimi na taumafai mai ai pepe.
E 4kilo o le tama’ita’i o Tiara.
“Ia e mo le silafia e 6 pepe o le tausaga lava ia, mai le vaeluaga i le 6 i le taeao e 3 pepe fou na fananau ai ma le isi tolu mulimuli ane.
“E to’afa teine ae to’alua pepe tama.
Na ia ta’ua na sologa lelei mea uma i le falema’i tele aemaise ai lava le tu’u’ese’eseina o nai fanau mai o latou tinā.
“Ia masalo ae o la’u ia lea iloa, o tatou lava le pepe muamua o le tausaga fou.
O matua o Tiara New Year e mai le afioaga o Satapuala.