Silia i le 300 e ono molia ona o le lē-resitala mo faiga-palota

04 February 2016, 12:00AM

Ripotia e Lanuola Tusani Tupufia 

Fa’aliliu e Maiava

 

E silia i le toluselau (300) tagata e ono molia i le tulafono ona e le’i resitala mo Faiga Palota Tele ia Mati, Aso 4, 2016, a’o tagata ua tatau ona palota,

O lea tulaga na fa’amaonia mai e le Sui Komesina o Faiga Palota, o Faimalotumua Mathew Lemisio i le talanoaga ma le Samoa Observer ae toe tasi le masina o’o i faiga-palota a le atunu’u.

 “Mai fa’amaumaua na tu’uina mai le Vaega o Fa’amaumauga mo e Maliliu ma Tagata e Soifua mai, e i se mea o le 300 i latou e mautinoa e le’i resitalaina fa’aletulafono,” o se fa’aaliga lea a Faimalo.

“Sa fa’atusatusa a matou fa’amaumauga ma fuanimera mai le Vaega o Fa’amaumaumauga, ma o le tulaga lena na maua ai le to’atele o latou nei e le’i resitala. O tagata ia e mai le ta’i-luasefulutasi (21) tausaga aga’i i luga ma ua matou toe talosagaina nei la mo isi fa’amaumauga e mafai ai ona iloa tonu i latou nei e le’i resitala.”

O lona uiga, e fai lava si to’atele o le atunu’u e ono molia nei i le tulafono ona o le le-lesitalaina o o latou suafa mo faiga-palota.

I sauanoga a Faimalo, o lo’o manino lava le tulafono, e tatau ona reisitala tagata uma ua agava’a e palota. O le tausaga ua mavae na tapunia ai le resitalaina o suafa.

O le vaiaso mulimuli lava mo resitala, sa tatala fa’asolo’atoa ai e tau i le fa i le afiafi o aso uma, le Ofisa mo Faiga Palota, ina ia mafai ona afifio atu le atunu’u ae maise latou e fa’atalitali pea i le taimi mulimuli e fa’atoa vevesi atu ai e fa’atino lea fa’amoemoe.

A’o luma atu, sa fa’agasolo ai pea polokalame a le Ofisa – e aofia ai le o’o atu i afio’aga ma alalafaga o le atunu’u, o fa’alapotopotoga ma isi vaega tuma’oti, e fa’amalosia tagata ina ia resitalaina mo faiga-palota.

Na fesiligia Faimalo pe sa iai nisi na molia muamua ona o le le-resitala, ae saunoa, na te le silafia na tupu se mea fa’apea muamua.

I lalo o le Vaega 18B o le Tulafono o Faiga Palota 1963, o lo’o fa’amalosia ai le resitalaina o tagata-palota, lea e fa’apea mai: 

(1) o se tagata ua agava’a e resitala o se tagata palota i lalo o lenei Tulafono e tatau (ona iai i Samoa), ona talosaga i le Komesina o Faiga Palota e fa’aaogaina ai pepa-fa’atumu mo le resitalaina o se tagata-palota i totonu o le tasi le masina mai le aso na agava’a ai e avea o se tagata-palota e fia resitalaina. 

(2) E molia so’o se tasi i lalo o le vaega lea, so’o se tasi e faia ma le iloa pe leai fo’i, le le-resitalaina o lona suafa mo palota lautele. 

(3) E le molia i le tulafonol so’o se tasi e talosaga e fia resitala pe afai sa talosaga muamua ae le’i manuia. 

(4) O se tasi e molia i se solitulafono i lea vaega o le tulafono, e mafai ona fa’asalaina i se sala e le sili atu i le 20 iunite tau-fa’asalaga mo se moliaga muamua po’o se sala e le sili atu i le 40 iunite tau-fa’asalaga mo isi moliaga mulimuli.

O le taimi nei, e 116,000 le aofa’i o tagata ua mae’a ona resitala mo faiga-palota.

O le taimi nei fo’i, e matua to’atele sui-tauva ua va’aia a latou fa’ailoilo ma fa’atosina ua fa’apipi’i solo i so’o se nofoaga o le atunu’u, a’o le’i resitalaina o latou suafa e avea ma sui-tauva lea fa’atoa tatala aloa’ia i le Aso Gafua a-sau nei. 

O lo’o aloalo malie pea le Ofisa o Faiga Palota i Mulinu’u, e fa’ama’ea nisi o galuega mo’omia e aofia ai le tapenaina o fale-palota ae maise le tu’uina atu o tali i le mau fesili o lo’o nunumi ai nei le atunu’u lautele.  

04 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>