Faate’a e le Afioaga lē sa avea muamua ma Minisita
Ua faatula’iese le Minisita muamua o Tupe ma o le Sui Usufono foi lea o le Palemene o Palauli Le Falefa-o Faumuina Tiatia Liuga, mai le afioaga o Sili i Savaii.
E tusa ai ma le Leitio a Niu Sila anapo, o lea faatula’iese e afua mai se faaiuga a le Faamasinoga lea na faaleaogaina le avea ma Sui Faatu mo le Faiga-Palota- le Alii o le Afioaga –o Le Tagaloa Pita, ona o le le faamalieina o le mana’oga tau monotaga poo se tautua i le afioaga.
O le Minisita Lagolago o le Matagaluega o Puna’oa Faale-Natura ma le Si’osi’omaga na te umia le suafa matai o Faaolatane i le afioaga o Sili.
Na ia tuuina atu lea lu’itau e faasaga ia Le Tagaloa Pita, lea sa avea muamua ma minisita o le tamaoaiga ma faasalalauga, ona o le mana’oga tau tautua i le nuu.
Fai mai se matai o lea afioaga ua faate’a foi e le afioaga le Pulenuu o le nuu, ona o lana molimau lea na lagolago ai le mataupu sa tuuina atu e faasaga i lea tamalii o Sili. O le uiga o le faaiuga na faate’a ese ai le sa avea muamua ma minisita, ma le Pulenuu-e le toe mafai ona nonofo i le nuu, pe vaaia pe toe tu-vae i totonu o le nuu.
Sa le mafai ona maua se fesootaiga ma Faumuina poo Le Tagaloa mo se manatu faaalia e uiga i lea mataupu anapo.