Tapena atoatoa Leoleo ma faa-totogaina mo faiga faatupu faalavelave i le malae o le Kolisi o Maluafou ananafi. Sa vave ona auina atu Tamaiti A’oga i o latou aiga ma o le a tapunia le a’oga i le asō ona o ni mafuaga tau le saogalemu, faatasi ai ma le matua sauni atoatoa o pulega mo se osofaiga e ono tulai mai i le aoga a le isi a’oga o loo i luga o le auala.

O lea faamata’u na fai i luga o le Facebook faatasi ai ma se faaaliga a se tasi e faapea o “Vadoz Lokoz” lea na ia tapa ai tamaiti a’oga ina ia avatu ni naifi, pomu kalasini ma ni ma’a mo le osofaiga. O lea faamata’u, lea e masalomia na fai se tasi e a’o i le Kolisi o Avele, na soso’o ai ma se misa i le va o a’oga e lua i Maluafua i le Aso Faraile talu ai.

O lea faamata’u sa faatonutonu e tamaitai a’oga o Avele ina ia o atu i le pasi a Magiagi ona feosofi ese lea i le itu i le vaitafe, e faafeagai ma le Kolisi o Leifiifi. Ona toe faailoa atu lea i tamaiti a’oga e faaauau atu i Maluarfou e amata ai le osofaiga.

“Fasi tama uma ma teine uma o le a’oga, ia ‘aua ne’i i ai se tasi e faasaoina e aofia ai ma faia’oga,” o le faitauina lea o lea faaaliga.” O lea faaaliga na faatonuina ai tamaiti o le Tausaga 9 ina ia avatu naifi laiti, o tamaitai tausaga 12 ia avatu ni fagu ma o tamaiti tausaga 13 na talosagaina ina ia avatu penisini. “Ia mautinoa lelei ua uma ona e fasia teine o Maluafou e pei lava o lena e te fasi se tama….ma tatui latou i naifi.”

Sa le mafai ona maua mai se manatu faaalia mai Leoleo ananafi. Ina ua fesoota’i atu i le Pule o Avele, o Matafeo Reupena Matafeo mo sona manatu faaalia, fai mai a ia o loo fai le fono a lana aufaigaluega.  “Ua ou iloa le mea ua e valaau mai ai ae o lea e fai la matou fono i le taimi nei e talanoaina lea mataupu,” o lana faaaliga lea.E leai lava se isi ana upu.

E o’o lava i le Pule o le Kolisi o Maluafou poo le Faatonu o A’oga a le E.F.K.S. o Reverend Vavatau Taufao e leai sona manatu sa faaalia e uiga i lea mataupu ananafi. Ae o se faia’oga o le Kolisi o Maluafou, o ia lea na talanoa mai i le Samoa Observer i luga o le aiaiga ina ia le faaalia lona suafa, fai mai o le faaiuga ina ia tapuni le aoga  e mo mafuaga tau le saogalemu.

“Na matou faalogo it ala e faapea o le a osofa’ia la matou a’oga,” o lana faaaliga lea. “Matou te le fia saili avanoa  e tusa ai ma le saogalemu o tamaiti a’oga.O lea ua matou manatu ai o le mea lenei e sili ona lelei a’o matou sailia se feutanaiga e toe faalelei ai ma Avele. 

“Ou te faamoemoe o le a mafai ona fo’i lenei faafitauli a’o le’i aulia le faaiuga o le vaiaso talu ai ua leva ona matou tapena mo le matou Aso o le Gagana Peretania-ae o lenei ua le mafai ona faagasolo.” Na tuua’ia e le faia’oga le faaaoga sese o le ‘social media’ mo le faatuputeleina o lea faalavelave.

“O le taimi lava e pa’i ai tamaiti a’oga i lea tulaga, e le toe mafai e faia’oga ona fai se mea i ai,” o lana faaaliga lea. Na faamaonia foi e le faia’oga e faapea o le to’alima o tamaiti a’oga mai Maluafou na ave e Leoleo ona o se fusu’aga i le vaiaso talu ai.

O le mea o loo tupu e matua faatiga lava,” o le faaaliga lea a le faia’oga. “Ae peitai-e le mafai ona matou faatalalē i le saogalemu o tamaiti a’oga ma o lea ua matou manatu ai- e sili ona lelei ona latou nonofo i aiga a’o taumafai Leoleo e faatulaga le mea o loo tupu.”