Ua ta’utino le solo a le tamaloa, ma fai le folafolaga a Lupesoli’ai La’auliolemalietoa Joseph Parker ia Samoa.

“’Ou te folafola atu, e iai se aso ‘ou te fo’i mai ai ma le fusi o le siamupini i Samoa nei,” o lana fa’aaliga lea. “O le a ‘ou alu iai ma le agaga atoa, ia fa’afiafiaina ‘outou uma. Fa’afetai tele mo lau lagolago Samoa.” 

O le Aso To’ona’i talu ai, na fai ai le folafolaga lea a Lupesoli’ai i le Malae Ta’alo i Tuana’imato, ina ua fa’atalanoaina e le Fa’atonu o le Samoa Observer, Mata’afaa Keni Lesa, lea sa fai ma fofoga o le po o Fusu’aga na lagolagoina e le kamupani a le Vailima.  

O Lupesoli’ai sa avea ma malo fa’apitoa i lea po. Sa ‘auai fa’atasi ai ma ona matua, o Dempsey ma Sala ma lona uso. 

Na ta’ua e Lupesoli’ai, o lana paga o le a soso’o nei, sa fuafuaina lelei lava e tapena ma sauni lelei ai mo le fusu’aga i le fusi a le lalolagi  pe a maua o le avanoa. O le a fetaui Lupesoli’ai ma le sau’ai Rusia o Alexander Dimitrenko e 2.01 mita le ‘umi, i Manukau Niu Sila ia Oketopa.

 “O le sau’ai lea o le a ma fusu,” o lana fa’aaliga lea. “E ono-futu fitu inisi le ‘umi ae ‘ou te iloa, a lelei lava a’u tapenaga, e mafai lava ona to’ilalo so’o se tagata i le lalolagi pe a ma fusu.

“Muamua, ua ‘ou fiafia ina ua o’o mai i lo tatou atunu’u nei. ‘E ‘ese lava lagona ma mafaufauga i le va’ava’ai atu i le mamalu o le atunu’uloaloa i lenei po ae maise fo’i tagata o lo’u aiga, o’u matua, o uo ma uso o lo’u tama. 

 “A ua fo’i mai mo se vaiaso se tasi; e toe taliu i Niu Sila i le po o le Aso Lulu ma mafuta ai ma nai o’u matua mo nai aso i Niu Sila, ‘ona lele ai lea i LA i le Aso Sa e sauniuni mo le isi fusu’aga.”

Na fa’aaoga fo’i e Lupesoli’ai le avanoa lea e una’ia ai tupulaga-fusu talavou o le atunu’u.

“E faigofie lava le fe’au mo ‘outou; ‘ou te iloa le to’atele o tapulaga talenia a lo tatou atunu’u. Pei fo’i ona ta’ua so’o, o Samoa lava sa masani ona avea uma pine-‘auro i aso ua mavae, a’o le taimi nei, ua fai lava si pa’u teisi. 

 “O se tulaga manaia tele le va’aia o le lagolago a nai laufali ma latou uma o lo’o ‘auai.

“O le mea moni lava lea, e le o toe mamao ae toe o’o Samoa i le tumutumu, pau lava lea o le ‘ave o le lagolago o lo’o mo’omia e tatou tama-fanau lea e matua to’atele lava i le taimi nei.

“Tatou ‘ave iai le avanoa, le lagolago ma fa’amalosi’Au iai, una’i ma saga una’i ma ia saunia mea uma latou te mo’omia.” Ae fa’atali la…E le gata sa fa’afiafiaina le atunu’u e fiafia i fusu’aga, ‘ae na matua fa’amalieina fo’i le fa’afofoga fo’i le itupa-vaivai i le mea tonu o lo’o atu-masalosalo ai.Na fesili Mata’afa pe na o ia lava i lenei taimi, ae tali Lupesoli’ai: “E iai se tama’ita’i i ‘ina e fai ma a’u uo?”Ona liliu lea o le siamupini i lona tua’a (tina) ma fesili: “Mama, e sa’o e leai sa’u uo?” Na fa’alala mai lima-matua e lua o le ‘olomatua, ona ‘ata lea o Lupesoli’ai ma fa’apea mai i le ‘au-maimoa: “Silasila la, e fa’amaoni la’u tala... e leai sa’u teine…fa’afetai mama.”