Lauga - “Ia outou talia le Agaga Paia”

Tusia Rev. Petaia Setu ,

92 Hits

Rev. Petaia Setu

Rev. Petaia Setu

(Ioane.20:22)

Ua tuanai atu taimi o perofeta. I le, ua i si’ui foi o le mafutaga, Iesu ma lona ausoo. A o taimi foi ia ua sili ona tāūa i le momoo, pe se ā se toe upu a o se mavaega mo le aiga ma le galuega. Ua toe tu Iesu. O le a afio a’e o ia i le lagi. O lana fetalaiga, Ia outou manuia.. Faalua, Ia outou manuia… ona mānava atu lea o ia ia te i latou ma faapea atu, Ia outou talia le Agaga Paia.

Ua uma ona folafola e Iesu le malosi lea i lona ausoo. (Ioa.14:16) O le fesoasoani i aso uma; e tumau pea e oo i le faavavau. E le talia e le lalolagi, auā e le iloa e le lalolagi; e le vaaia foi e le lalolagi. Ae le mafai ona iloa pe afai e le talia i lou loto Iesu. E le mafai foi ona vaaia e mata pe afai e le talitonu. A o le Agaga o le upu moni.

Ua uma ona faia e Iesu o galuega uma na auina mai ai e lona Tamā. Ua savavali pipili, tautala gūgū; pupula tauaso; faalogo tutuli, toe faatutū i e ua oti, ma le tele o vavega ma faailoga tetele ma le ofoofogia! E manaomia ona faaauau pea ia galuega uma. A o le fesili, O ai la e faia? E leai se malosi o i le ausoo. Faapefea ona faamoemoe iai se galuega faaola, lele ua loka mau  le faitotoa ae faapupuu uma ai i le fefefe ia Iutaia? Fai mai le atalii o Sepetaio, Ua tu Iesu i totonu o le potu a o loka uma faitotoa. Ua faamanuia; ona mānava atu lea o ia ia te latou, faapei o ni tagata ua oti, ua leai se faamoemoe ola o iai.

 

E faapena foi i la tatou galega tala’i, ma lo tatou ola tapuai. Ua na ona faafetefete ma amo le tofi, a ua iloa uma atu e tagata le oti! Ua tele le malamalama ma le iloa o le Tusi Paia; ae le o lagona e tagata ma latou lē amana’ia! E manaia i le faalogologo, ae le o liliuina ai le loto! Aisea? Uso e, o loo misi le mānava ola mai le Alii e ana le feau. E leai se faauuga a le Agaga. Fai mai Iesu, Ia outou talia le Agaga Paia. Samoa, o le Agaga Paia mo oe. Mo tagata uma. O le paoa lea ua faailoa ma tuuina atu e Iesu, e faafoe ma faamanatu ai pea mea uma na faia e Iesu ina ia faaauau ma tumau ona galulue ai. O le Agaga ua iai le ola. Le Agaga ua fegaoioia’i i luga o le fenumia’i i le amataga, ona ola ai lea o mea taitasi uma o le foafoaga. Na mānava atu i poga’i isu o le ulua’i tagata, ona avea ai lea ma tagata ola (Ken.2:7) Le Agaga na ia ave le perofeta i le fanua laugatasi o iai ivi mamago, ona mānava atu ai lea mai matāmatagi e fa, ma avatu ai le ola i ia ivi mamago. (Ese.37:1-10)

O le malosi o ai o loo taitaiina ai oe? Se agaga o ai o loo fetosoaiina ai lou olaga? Tele ia o agaga faalavelave o loo ua sapasapa solo ai olaga o o tatou tagata. Ua tatou toilalo ai i mea uma. Ua fetuuina ai lo tatou taunuuga. Ae tasi lava le Agaga ua iai le ola. Ua iai lou saolotoga. E faamaoni le alofa. O le Agaga Paia; o le Fesoasoani lea mo oe ma ou tigā (Ioa.14:26). Fai mai Iesu, ua i le Tama le pule e faataunuu ai ana polokalame i lona itu aso e finagalo ai. A o outou, e maua e outou le mana pe a afio ifo le Agaga Paia i luga ia te outou (Galu.1:7,8) Ua tatou vaavaai la ia Peteru. Ua uma le olaga tuai sa fealofa’i solo ai (I Kori.13:11). Ua le toe faagutugutulua; ua le toe pepelo; ua le toe fia mata muamua i mea o le olaga nei; ua uma le masalosalo; ua te’a le pala’ai. Ua tama mătua i le faatuatua. Ua taulamua i mea lelei. Ua tautala i le ola (Rom.10:9,10). Ioe, ina ua maua le Agaga Paia (Galu.2:1-4). Ua le toe pologa, a ua fai saoloto le galuega faaola (II Kori.3:17). E  silia i le tolu  afe tagata ua faaolaina i le mana lea. (Galu.2:41) E le o Peteru; a o le Agaga Paia. Fai mai Iesu, Talia le Agaga Paia, ona maua lea e outou le mana e fai ai mea uma.

Samoa e, ua ia i tatou uma le Agaga Paia; peitai, o loo faafaigatā ona e talia. Salamo nei, ma fo’i loa i le Atua ma le loto faamaoni, ina se’ia papatisoina oe i le Suafa o Iesu Keriso mo le faamagaloina o agasala, ona maua lea e outou o le mea foai fua, o le Agaga Paia lea. (Galu.2:37,38)

Uso e, ua tatou iai i le vaitau o le mau faafitauli eseese ma le malosi faanei onapo. Tulai mai Samoa. Ia outou loto tetele ma tutumau ma le faatuatua i le Atua lo tatou faavae. Vaai lou aiga. Vaai lau galuega ma ou faiva. Faalogo i le siufofoga alofa o Iesu mo oe, Ia outou talia le Agaga Paia. Ona e saoloto ai lea ma e manumalo i mea uma. Ona outou ola fiafia ai lea ma manuia i aso uma. 

Se a se isi ou mana’o pe a ‘e maua le Agaga Paia?

 

Amene

7737063

E-mail: petaiasetu@gmail.com

© Samoa Observer 2016

Developed by Samoa Observer in Apia