E silia ma le 10 tausaga talu ona nofo pologa le aiga o Chadwick mai i le leai o se suavai.

O Taylor Chadwick o le tamā mai le afioaga o Alesia Sasa’e e to’a iva lana fanau.

I le  faatalatalanoaga ma le Fofoga o Samoa sa ia fa’ailoa ai lona le fiafia i le Ofisa o le Suavai ona o le le oo atu o se vai i uta i le nofoaga o lo’o o latou nonofo ai.

Sa ia ta’ua fo’i e le na’o ia o loo feagai ma lea faafitauli tele e fai lava si toa’tele o aiga ua nofoia lea nofoaga talu mai le vaitaimi o le tsunami.

“Sa i ai le poloketi a le malō i le isi vaitaimi ina ia oo mai ai le suavai iinei ae peitai na gata i lalō e le’i oo mai I luga iinei ona faimai ua uma le tupe na aumai e faatupe ai le poloketi lea.

“O se faamatalaga faavalevalea tele lenei faamatalaga na fai mai, ona o lea lava e maitau atu o loo fai lava fale tetele a le malo ma isi atina’e a’o lenei e le mafai ona faauma le poloketi ona fai mai ua uma le tupe.”

Sa ta’ua e le tamā e leai se mea o i ai pe afai e nonofo e aunoa ma se eletise ae a leai loa se vai o se olaga faigata tele.

“O le vai o le ola lea o le tagata.

“E mafai ona tatou ola e aunoa ma se meaai poo se eletise foi ae le mafai ona ola e aunoa ma se vai ona o le ola lea.

“Pau le tulaga lea e i ai matou i uta nei o le faatalitali timu ina ia maua ai se matou suavaia.

“Sa fai le matou talosaga o le matou vai ae sau foi le tali mai le ofisa o le vai e le mafai ona sau se vai iinei ona e le pasia le nofoaga lenei e mamao.

“O matou e pei ona e silasila mai o lea e toso le paipa ae o le paipa lenei o le paipa a lo’u uso matua o loo nofo i Tapatapaō e mita foi le latou vai.

“E tape faasoloatoa seiloa matou te vili atu i ai e ti mai lana paipa sei faatutumu ai matou talone vai ona ti mai lea a uma foi ua tape faasoloatoa ona e manumanu foi si o’u uso e mita le latou vai.

“E ese le faigata o lenei olaga.

“O la’u talosaga i le ofisa o le vai afai ua le oo mai le vai i uta nei faamolemole aumai ni tane vai mo matou nei ina ia faamama avega ai ma sefe ai le vai.

“Afai o lena tou te ola I le suavai matou te fia maua foi lena faamanuiaga.”

Afai e te fia fesoasoani i le aiga o Chadwick faamolemole faafesootai le numera o le telefoni 7756329.