Lauga - “Ia faalelei oe ma le Atua”

By Rev. Petaia Setu 01 October 2017, 12:00AM

(II Korinito.5:20)

Se ā se mea ua tupu? E mafua i se ā ona faalelei? O upu o le muagagana e masani ai le gagana ‘e le falala fua le niu. O upu foi o le pese a le EFKS, e le tutupu fua mea faapena! Ioe, o le mea ma lona mafuaaga. E afua le ifoga, ona ua le maua se saolotoga. Ua fai le agasala matuiā ma āmoga! E manaomia le leleiga.

O iai le au taufaasesē i le ekalesia i Korinito, ua fesēa’i ai manatu ma faai’uga a tagata. Ua fesiligia ai le pule a le Atua sa tofia ma valaauina ai Paulo e fai ma faifeau! Ua femēmēa’i ai le toatele, ma ua taumālua ai foi ma le faatuatua. O le tatalo a le aposetolo i lana tusi atu i le ekalesia, “ia outou lelei ma le Atua.” Ia fai se faaleleiga ma le Atua.

O le taula’iga lea o le galuega a Paulo i le vaega muamua o lana tusi lona lua (II Kori.5:20). O lona uiga, e foliga mai o lo o va le fogāvaa! O loo iai maseiga. Auā e ta’u loa Korinito, ona tatou iloa loa lea, e lua faiga nuu. O le vaega o loo i totonu o le nuu, ma le vaega o loo i tua.

O le siomaga lea o loo fetosoa’iina ai le ekalesia i Korinito. E ui o le toatele ua toe saga tonu lelei ma talia le faatonu atu a le aposetolo i lana tusi muamua, peitai, o loo iai se vaega itiiti o loo latou te’ena pea Paulo i lona tulaga faa aposetolo poo ona faiva faa faifeau o le talalelei. O le itū e sili ona vaivai, ona ua le o se manu’a mai fafo, a o le manu’a lava i fale e pei o ia upu a toeaiina! O le au failotu lava! O tagata lava o le ekalesia! O Iutaia lava! O afaina ia o ā tatou feau ma galuega o aso uma. E momoe lava foi ma manū, a o mala e atia’i! Sa tupu i ia ona po i Korinito.

A ua se tai faana’e i Samoa i nei ona po. E ‘eli lava e le isi faigaluega le lua o le isi faigaluega. E foa lava i le uō. E toe toso lava i lalo e le isi Samoa le isi Samoa. E sa’o pe a ou fai atu e tausolomua i le au mapo lotu? E matua’ina lava e le au sa Levī? Ae mafai Samoa ona tupu sea ituaiga uiga leaga i se atunuu lotu? I se faapotopotoga o tagata Kerisiano ua faavae ia Iesu Keriso? Manatua foi o taitai lava o le lotu sa latou molia lo tatou Alii Faaola? Pe le o Iutaia ea lava sa alalaga e faasatauro Iesu? E le taumate lava o loo lotolotoi ai ma oe i le vaega lea a? E tino ia Esau ae leo ia Iakopo? Ona o Paulo o le faifeau na valaauina e Iesu Keriso, na faau’uina ia Iesu Keriso, o le sāvali a Keriso (Christ ambassador), ua ia tatalo mai ai i tagata uma lava, ia faalelei ma Keriso. Ia toe lelei oe ma le Atua. Auā ua faasilisili lava oe i le finagalo faaola o le Atua.

Samoa e, e tasi lava le upu e tonu lelei ma atoatoa na te faamatalaina le leleiga, o le fealofani. E manuia ulugalii fealofani. E ola aiga fealofani. E maopoopo nuu ma faalapotopotoga fealofani. E saoloto le atunuu i le fealofani. E mafai ona tupu se leleiga e aunoa ma le alofa? O lona uiga, o le alofa i le Atua, e fausia ai le leleiga a oe ma le Atua. A o le alofa i le Atua,e inu ai i lu’itau ma faigata o lenei olaga. O le ala foi lea o le faatauvaa ia Paulo o le tu’ua’iina ma le faasinosinomia o ia, o le upuia ma le tauleagaina o lona tagata, auā o lu’i ia e tofotofoina le alofa i le Atua. Ua matuā faatauvaa lava foi ia Paulo lona ia lava tagata, a ua manatu i sona olaga toe fuata’iina i se Paulo fou, se tagata ua atoatoa ona tuuina atu ia Keriso, auā o tino na o le va tausi ma le faaleleiga ma le Atua. 

Samoa e, e le taugofie le leleiga. Afai e fou gatā ona tapena le ifoga ona o atugaluga ma popolega i le ola, e le tatau foi la ona māmā ia te oe ona tapena lou tagata e faalelei ai ma le Atua. O iinā e talatala atu ai i le Atua lou tagata ma le faamoemoe o lou ola. O le ifoga, e mai lalō. O lalō, lalō lava e te maua iai mālō. E tia’i ai le ola. E maua iai le saolotoga. E manino ai le alofa. E te le faalelei atu i le Atua i ni ou mamalu, poo ni ou tamaoaiga, poo sou poto. Fai mai Paulo, “Afai ua matou valea,ona o le Atua...” Ua vaai mamao le aposetolo i faamanuiaga taeao. O lona talitonuga lea. E aumā le faavalevalea ona o le Atua? O le ā le afaina o le ta’uleagaina ona o Keriso? O le suamalie lea o le alofa i le Atua, o le inosia ona o le Alii o Iesu. O lalo lea Samoa, e faavae ai le leleiga ma le Atua.

O lalo lea Samoa, o le fanua fanau o le alofa i le Atua. O le salamō, e amata mai lalō. O le fanaufouina  i le Alii, o lalō. O Keriso, o lalō.  A ‘e maua lalo, ua e maua Keriso, ua tagata fou oe. ’A ua fou lou  tagata atoa, se ā se isi mea e vaoia ai lou faalelei atu i le Atua? O le aioi a Paulo, “matou te ole atu,o sui i matou o Keriso, ia outou  lelei ma le Atua.”

Samoa pele e, o le finagalo alofa lea o lo tatou Atua e ala mai ia Paulo ma le au aposetolo,ia tatou lelei ma le Alii lo tatou Atua. Auā o ia na mua’i  alofa mai. Ia tatou fealofani ma lo tatou Alii. Ia mafai ona tatou alolofa atu ile Atua i le atoatoa ma le faamaoni  uma lava e tatau ai.

O le agaga lea o loo taumafai atu ai le aposetolo i le ekalesia i Korinito. Ia malamalama i le faavae na afua ai. Ia toe foi i le moni na amata mai ai. Ia salamō i le le maua’a i le Alii. Ia liliu ese mai manatu sesē ma a’oa’oga ese o loo ua filogia ai le talitonuga ma le faatuatua i le Alii o le toe tu. Ia toe fuata’iina le loto ia Keriso Iesu. Ma ia toe faalelei ma le Atua. Le atunuu e, o tatou o tagata fesēsēa’i. Tatou te femoumoua’i. Mai lava i le amataga tatou te masalosalo i le agalelei ma le alofa o le Atua. La lea tatou te ola fematea’i ai pea i aso uma.

Na i’u i lo tatou foua o le Atua, ma ua soli ai le tapu a le Atua, na ala ai ona tuliesea o tatou ulua’i matua mai le faatoaga, ma tulituliloaina i tatou e puapuaga o le olaga. A o le Atua, o le alofa lava ia. Ua le manatu ia fano le tagata ua faatuatua ia te ia, a ia maua le ola e faavavau. Ua ia saunia le feagaiga o le alofa tunoa. Ua aumai ai lona atalii pele e toatasi, o le na le iloa le agasala, a ua fai o ia ma agasala, o le sui o i tatou, ina ia avea oe ma a’u ma amiotonu a le Atua i lona lava soifua (f.21).

Samoa e, e le taugofie le leleiga. O Iesu Keriso, na faia le leleiga o oe ma a’u i le Atua. Ae le o le mutaaga lena. Auā ua tuusaolotoina i tatou e le Alii lo tatou Atua i tofotofoga eseese o lenei lalolagi. Ua ia te oe lau lava filifiliga saoloto. Ae le o nofoa’i Paulo. O loo finau pea le aposetolo ina ia liliuina atoatoa i tatou i le Alii o Iesu Keriso. Ia tatou faamaulalo, ma liliu atu i le Alii e faalelei ma lo tatou Atua.

Le au uso e, e afaina mea uma, pe afai tatou te le ō ese ma luga. Ua manu’a le mafutaga, auā ua see ese ma le faavae mai le amataga. E maua i fea se filemu o oe ma lou to’alua? E faapefea ona faamaopoopo le mafutaga faa-mātua ma fanau? O ai na te faapotopotoina aiga fe’aina’i? O fea e saili iai manuia o le nuu? A o afea e saoloto moni ai le atunuu? Ua pa’ū maulalo le ola faaleagaga o le ekalesia, a o le amioleaga ma le solitulafono ua le taofiofia! O le ā se fofō?

Samoa e, o le tali lava Iesu i mea uma. Fai mai Paulo, auā e le mafaia e se tasi lava mea na faia i le lagi ma le lalolagi ona aveesea i tatou mai le alofa o le Atua, o loo ia Keriso Iesu lo tatou Alii. (Rom.8:38-39). Salamō nei loa, talia Iesu Keriso i lou olaga. E le mafai ona faalelei oe ma le Atua pe afai e te le alofa atu i le Atua i lou loto atoa, ma loa manatu atoa, ma lou agaga atoa,  ma lou malosi atoa. O le atoaga lena o le leleiga. Sena e, se a se isi mea o ‘e manatu iai e faalelei  ai oe ma le Atua pe afai e le o lea?

 

                               Amene

 

7737063/7783782

By Rev. Petaia Setu 01 October 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>