Tagata Logologoā sa Fa’aletonu

By Fa’aliliu e Maiava 05 May 2016, 12:00AM

Toe mafaufau tasi lava…O le to’atele o tatou, e iai taimi sa fa’apea ai, e le mafai lava ona tatou ‘ausia atoatoa manuia o lo’o fa’ananau i ai, e le gata i totonu o galuega ae maise fo’i o mea e manana’o ai.

Ae tatau ona silafia, toeitiiti o tagata uma sa matua finau malosi ma taumafai i mea e fa’amoemoe iai, e taunu’u lelei ma i’u manuia. Pei ona taua e se tasi ta’ita’i: “Ua fa’amaonia i tala-fa’asolopito, o le to’atele o tagata e manumalo ma i’u-lelei, sa feagai ma le tele o fita ma faigata, a’o le’i manuia. Mafua ona manumalo, ona e le-fia to’ilalo, e le-fia faia’ina fo’i.” 

O John Grisholm o se tasi o tusitala lauiloa, o nisi o ana tusitusiga na o’o lava i Hollywood, e  pei o tusi nei: - The Firm, The Pelican Brief, Runaway Jury ma lana ulua’i tusi, A Time to Kill. Peita’i i le amataga lava, na te’ena ai e kamupani fa’asalalau e 29! E o’o ane ina ua lolomiina ma fa’asalalau e se kamupani fa’asalalau la’ititi, e na o le 5,000 kopi o le tusi na taulia. Talu mai lena taimi, e silia i le miliona ma milona tupe na maua mai ana tusi uma na tusia. 

O Michael Jordan na manatu le to’atele, o le tagata-ta’alo aupito ta’uta’ua lea i le ta’aloga pasiketi-polo, peita’i a’o a’oga, e le’i filifilia i le ‘au a le a’oga ona fai mai le Faia’oga, o pu’upu’u tele Michael.

O Thomas Edison, le ali’i-su’esu’e ta’uta’ua e silia i le 1,000 masini ma isi mea sa ia gaosia. A ina ua fesiligia e vaega fa’asalalau e uiga i isi vaega e 2,000 e le’i ‘ausia ae tali: “’Ou te le’i fa’avaivai lava i se taimi. O le gaosiga o le matā-uila na fa’atoa maua ina ua mae’a le la’asaga lona 2,000 o lona fa’atinoga.”

I le tausaga e 1954, na pese ai Elvis Presley mo Jimmy Denny, o se ali’i-porofesa tau-musika. Mulimuli ane, na fai i ā Elvis: “E le-lelei sau pese, leiloa po’o fea e te aga’i ai …atali’i. E sili ai lou toe fo’i e ‘ave-loli.” E le’i popole iai Elvis i tala a le “porofesa” ae na finau lava ma avea o le Tupu o Musika Rock & Roll ma aupito tele atu ana pese na fa’atau nai lo se isi tagata pese i le lalolagi. 

Ae le’i avea George MacArthur ma ta’ita’i iloga o taua tele e lua a le lalolagi, sa fa’alua lava ona te’ena e le A’oga Fa’aMiliteli i Westpoint! Ae sa taumafai pea ma taumafai pea le ali’i, ma i’u ai ina talia; ma ina ua fa’au’u, na finau pea ma aga’i ai lava ina fa’amauina i tala-fa’asolopito, o se tasi o ta’ita’i-‘Au iloga i le lalolagi. 

Tatou uma o tagata-soifua, e tofu ma sasi, e iai fo’i fa’aletonu. Peita’i, o nisi ua i’u manuia ma fa’ataunu’uina o latou fa’amoemoega, sa leai se avanoa na tu’u ai i se mea-sese, e le’i taofia fo’i le finau malosi ina ia ‘ausia le sini na tulimata’ia. A tatalo ia Iesu – Le na avatua lou malosi ma le malamalama, o le a fesoasoani ia ‘Oe, ia avea o se tasi e fa’aaogaina ana mea-alofa, ia ‘ausia ai ou fa’amoemoega uma, ma e soifua fiafia ai i taimi uma o totoe i le ola nei. Toe mafaufau tasi lava…

By Fa’aliliu e Maiava 05 May 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>