Matua lau pule lea
Ua silimea nei le seuga,
Aoaoga o lenei tausaga ua taualuga.
Ua ae i fanua le faatautaiga,
Le toatele o fanau ua faamaeaina taumafaiga.
Ua tini ma tau lau o nisi o faamoemoega,
Ao nisi e moomia pea le faaauau o le tamoega.
E mua ai la le viiga i le Atua,
Uso e,ia natia pea i taua.
O le upu moni e gaoa le ala i manuia,
Peitai e tau i manu faiva e tapuaia.
Le galuega fita lea a nai matua,
O so ta manuia sa tulivae ai i luma o le Atua.
O ala sa o matou uia sa fola ia outou talosaga,
Le uiga moni lea o le matua faitama.
E te lei manatu i le timu ma le la,
Ae na sili lou manatu ina ia ou aoga.
E te lei manatu i le pologa ma le tigaina,
Ae na sili lou manatu ina ia ou faaeaina.
O le upu moni ana le seanoa a outou tatalo,
E le tuta i fanua le vaa sa o matou taualo.
Faafetai i lo outou lava papale ma le onosai,
Faafetai tatalo malo tapuai.
Ae o a matou toe upu e faapea,
MATUA LAU PULE LEA