O la’u tala fo’i

152 Hits

1. Matauina i Tala Fou se faaaliga mai le Matagaluega o Leoleo-poo se faamaoniga o le saogalemu o Aso Malolo o le Kirisimasi ma le Tausaga Fou ua mavae atu.

E ui lava i isi faalavelave na tutupu e pei o nai tamaiti ma isi  ia na malelemo i Mulinuu, ae o le upu lava i faalavelave tau taavale sa sili ona popole i ai-o lea lava ua amata ona faautagia e le atunuu le faamoemoe atoa o le Ofisa o Leoleo-ina ia saogalemu mea uma-ma o lea lava ua tino mai!

O le pogai moni foi lea e mana’omia ai lava Leoleo i luga o ala tetele i taimi uma o le aso ma le po pe afai e mafai ona faatino.

E mafua se manatu ona-e na o Leoleo lava o le Malo e aloa’ia e tagata-ae o le upu lava i le faatino e nisi o ia tiute o Leoleo-ia o le Tala i le Tusi Oti e pei ona fai mai ai le atunuu-O lona uiga-e le kea i ai le atunuu vagana lava ua vaaia Leoleo o le Malo-talu ai o le Malu lea o le Malo o Samoa.

O le mea lea e momoli atu ai lava le faafetai ma le faamalo i le Komesina o Leoleo-le Afioga ia Fuiavailili Egon Keil ma le mamalu o le Ofisa-ona o le tautua atunuu! O lea la ua outou silasila i le taui o lo outou tautiga-ua saogalemu Samoa i nei aso fiafia ua mavae atu.

E faapea foi ona momoli atu le faamalo ma le faafetai i matagaluega uma a le Malo ma faalapotopotoga sa gafa ma le tautuaina o le atunuu i Aso Malolo  ua mavae atu! E leai se afu e maligi fua-e leai foi se tautua e le tauia-talu ai o le mea lelei e te faia mo le isi uso-a-tagata-o le finagalo moni lava lena o le Atua! O le a sou taofi? 

2. Matauina foi i Tala Fou nisi o suiga fou ua faatino i nisi o matagaluega a le Malo-e ala i le tofia o ni Ofisa Sili fou o Pulega mo nisi o Matagaluega-ma o nisi o i latou ua galulue nei i o latou tofiga fou. O lea la ua mou atu le vaitau sa lūlū ai ma loimata-ae o lea ua selesele ma le alaga fiafia!

O le tuu-a-lalo la, masalo ua manaomia e le Malo ni suiga fou? Matou te le mafai ona faailoa atu poo a ia suiga-ae o le a outou silasila lava i ai i le faagasologa o outou faiva ma tiute! Afai la o i ai se gasu tau faiga pi’opi’o-e le taumate o le pogai lea o le mana’omia o oe e fai ma foma’i-ae le o le faasalalauina o le siama!

Ma afai lava mo se faata’ita’iga e le masani ai lou soifua i ia faiga-e lelei ona e saunoa i ai –o oe o le Foma’i-ae le o se tagata faatupu faalavelave! Ia manuia outou faiva ma ia outou silafia-ua matua pagatia le atunuu i le mativa!

E te le tau alu foi e su’e-e te silasila lava i ai i taimi uma-i soo se itulagi e te aga atu i ai –i le ao ma le po! O le a sou taofi? 

Matauina foi Tala Fou fingalo faaalia o nisi e uiga i le Palota Lautele o lumana’i nei-atoa ma le faiga-malo e toe tulai mai.

O le matau lava i ia finagalo faaalia o le to’aono na faatalanoaina-e mafuli lava i le mana’o ia toe tulai mai le H.R.P.P. i le Faiga-Palota o loo loma nei- e toe taitai le Malo-talu ai fai mai e tele mea lelei ua fai e le HRPP! Ia-ona o Samoa o le Malo Temokalasi-o le mea lea- e pule lava le tagata ia ma lona manatu faaalia!

Ae o le fesili-afai e tele ni mea lelei ua fai e le HRPP-e faapefea mea leaga ma faiga pi’opi’o? A toe faaupu-o lona uiga –e tou te fiafia lava i latou i faiga-malo pi’opi’o! A tatou tilotilo la i le faitau miliona ma miliona o tupe a le atunuu na aafia i faiga pi’opi’o a le faiga-malo-faamata e matitiva masaesae faapenei le atunuu pe ana faaaoga tatau ia tupe mo le manuia o le atunuu? O malamalama ‘ea nei tagata i le afu maligi o le atunuu talu ai faiga a le HRPP?

E fia lafoga ia e totogi e tagata o le atunuu i le taimi nei? Afai e te faigaluega-e tipi le lafoga o lou totogi. A e alu e faatau se mea’ai poo soo se oloa mo le aiga-e toe totogi foi le VAGST poo le tiute o oloa ma auaunaga!

O ai la na faia ia lafoga? O le tali-o le HRPP! Afai o e totogiina se pili o lou moli eletise-ona e iloa lea-o lena e te totogiina le tau o le suauu lea e aumai e vili ai le eletise-ae totogi lava le pili o lou moli!

A e tilotilo lelei foi i le pili o lou moli-o lena foi e te totogiina le aitalafu a le Malo! A tatou tilotilo i le aitalafu a Samoa i fafo-o lea ua $1.1 Piliona! O ai e totogiina? O tatou ma isi tupulaga e tolu ma le fa o loo mulimuli mai- e totogiina lea aitalafu! Matou te le faatonuina le atunuu-ae afai e moni ua tatou matitiva-o lona uiga-e le mafai e le HRPP ona toe faaleleia lea tulaga.

Afai la o lea ua savali i le 40 tausaga o faafoe e le HRPP le malo o le atunuu-ae ua atili ai ona pagatia le atunuu-o lona uiga-o tatou e faia le suiga mo se faiga-malo tatou te manuia ai-ae le o le vaai atu lava ua sau le oti-ae fiafia lava e tilotilo i ai!

O le a sou taofi?

© Samoa Observer 2016

Developed by Samoa Observer in Apia