Fesili i le Atua, e tumau lava le Palemia i lana faaiuga

06 February 2016, 12:00AM

Tusia - Lanuola Tusani Tupufia 

Faaliliu e Seagaitumua Tupuola

 

O le Palemia lea o loo vaaia le Malo, Tuilaepa Sa’ilele Malielegaoi, o loo ona puipuia le faaiuga a le malo ina ia tofia ni faipule se to’alua ua leva ona tautua i le HRPP-i le Fono a Sui Tofia. 

.”O tofiga uma e mai le Atua,”o le faaaliga lea a Tuilaepa i le Samoa Oserver ananafi. 

 “O le mea lea- e tusa ai ma lo’u manatu, sa tatau ona faitio le Itu Agai i le Atua. Sa tatau ona latou fesiligia o ia ma fesili i ai pe aisea ua fai ai ia tofiga e pei ona faia. E le tatau ona galo ia te outou o soo se tofiga lava e mai le Atua e ala i le Agaga Paia lea e musuia tagata ma faamanatu ia i latou e faapea o le faaupuga lenei a le Faavae ma o le faiga lea e faatino ai.”

O faaupuga ia a Tuilaepa na fai e tali atu ai i fesili mai le Tautua Samoa Party e uiga i le tofia o Le Mamea Ropati ma Tuiloma Pule Lameko i lea galuega. O ia tofiga na fai e le vaiaso talu ai ina ua mae’a ona faamaonia e le Palemene se lafo mai le Palemia.

Ae peitai, fai mai le Minisita Faaolioli o Tupe a le Tautua Samoa Party o Afualo Dr. Wood Salele, o ia tofiga ua le aloa’ia ai le sao na fai e Savaii i le atiina a’e o Samoa. “E le o se malo na o Tumua-o le malo e aofia ai Tumua ma Pule…..Ou te alofa i tagata o Pule e Ono talu ai ua na o lo latou tilotilo mai ae faaaoga e Tumua mea uma,” o le saunoaga lea a Afualo.  Fai mai le taitai o le Itu Agai o Palusalue Faapo II, o ia tulaga e tatau ona taofi mo i latou e umia suafa o Tama-a-Aiga.”

Ae peitai-sa teena e le Palemia  Fai mai a ia e tatau ia Afualo ona toe alu i tua e faitau le Tusi Paia.  

“O lea Polofesa e tatau ona toe faitau i le Tusi Paia ma taumafai e malamalama i lona uiga loloto, o lana faaaliga lea. “Atonu o le pogai lenei na tusia ai le Faavae e pei ona tusia ai e o tatou matua ua mavae.”

Fai mai Tuilapea e le o manino mai le Faavae  e na o Tama –a-Aiga e agavaa i lea tulaga. Ae fai mai Tuilaepa ua faate’ia o ia ona ua fai ma mea mamafa lea mataupu i le Itu Agai i le taimi nei. “Afai e i ai se latou fautuaga faapena, aisea na latou le lagaina ai i totonu o le Palemene,” o lana faaaliga lea.  “O le faafitaui ona ua uma ona fai le faaiuga ae o lea ua latou fesiligia se faaiuga ua uma ona malilie i ai.”

E talitonu Tuilaepa o ia tulaga e avanoa mo tagata taitoatasi ia e agavaa.

“O ia tulaga e avanoa i soo se tasi e agavaa i lalo o le tulafono,” o lana faaaliga lea. “Pe o i latou o faipule mai Upolu ma Savaii, o le tulaga lava lena. Afai e uma ane e o mai uma lava i latou mai Upolu, o le tulaga lava lena o le a i ai. E faapena foi pe afai e uma ane le tofiga –o sui uma lava e mai Savaii, o le tulaga lava lena o le a i ai.” 

06 February 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>