Ia minoi e fua i le tau o le soifuaga
O le talitonuga o le tamā i a Faranisisi Raki o le pitonu’u o Samalaga i totonu o le afio’aga o Vaimoso e fa’apea , o le suiga tele o lo’o ua i ai nei le atunu’u o le si’itia ai lea o le tau o le soifuaga.
Na ia fa’ailoa o le auala e pito sili ona faigofie pe afai o lea ua mautinoa le alia’e mai o suiga ogaoga nei , ua tatau ai fo’i i le to’atele ona sui ma le minoi i le taimi lenei i le fa’atinoina o galuega aemaise o so’o se agava’a mo le tausia ai o le aiga.
“O le olaga lenei a le aunoa ma le ola taumafai e le mafai ona manuia so’o se taumafaiga.
“E ui lava ina laititi lenei togāla’au ‘aina e pei ona outou silasila mai ai, ia ae o le mea sili ona taua o lo’o mafai ona maua mai ai nai senesene mo le tausiga o le aiga.
“Ua savali i le lua masina la’u fa’ato’aga kapisi, ma o se mana’oga i a te a’u ia a’oa’o i ai le fanau aemaise o lo’u atali’i i le olaga galue o lo’o i ai nei, aua a avea fo’i ma tagata matua ae o lo’o iloa le fa’atinoina o vaega nei mo le aiga.
“E pei o se fiafiaga i a te a’u lo’u sau mai i la’u togā kapisi i aso uma.
O lana molimau na ia ta’ua ai o le taimi lenei a ona u’uina le $10 e pei lava o le 10sene.
“E pei o le tau lava o le soifuaga o lo’o ua i ai i le taimi lenei ua matua’i mata’utia lava.
“Ua avea lea ma popolega i le tele o taimi i nai o tatou tagata aemaise ua fa’afaigata ai le fa’atinoina o nisi o galuega e ao ona ave i ai le fa’amuamua ona o le taugata tele ua i ai.
“O le itu mautinoa, a le aunoa ma lo tatou ola finafinau ina ia ausia le tulaga o lo’o ua o’o ai le maualuga o le tau o le soifuaga e fa’aletonu taeao.
“E pei ona maitauina ia o lo’o i ai lava ele’ele e mafai ona fai ai nai fa’ato’aga ia ae ona o nai o tatou tagata lava e fai sina augatata i nisi taimi.
“Ia o le fa’agaioina ai o lenei fa’ato’aga e leai ni vaila’au o ave ai mo le fa’aleleia o le togā kapisi , ona o a’u ou te le talitonu lava i vaega nei.
E ui la ina tele fa’asea a nisi ona o le tele o tupe alu i mea fa’alelotu, ae o le talitonuga o Faranisi, o vaega nei e ao ona fa’atinoina aua e ala ai manuia i fanau, aiga, nu’u ma le atunu’u.