Ola punoua’i e manuia ai

By Vatapuia Maiava 07 January 2017, 12:00AM

Na fa’ailoa e le tinā i a Lemafo’e Tele’a, 49 le matua o le soifua o Vaiala i le Fofoga o Samoa e fa’apea ‘ o lo’o tele le tamaoaiga o le palapala mo le totōina o fuāla’au ‘aina mo le tausiga o aiga, ma e leai se mativa i Samoa.

“Ia o lo’u ia lea manatu i ai le taimi lenei, o le tele o nai o tatou tagata ua augatata e gaioi ma ua taumafai fo’i lea e nofonofo ae le o e galulue.

“O le isi lea uiga ta’atele o lo’o ua i ai le taimi lenei, aepeitai o si o tatou atunu’u o lo’o tetele fanua ma laueleele e o e galulue ai.

“Ae pei o lea le fa’alavelave e pei ona ou fa’ailoa muamua, ua paie ma o le mafua’aga lea ua ala ai ona tele le mativa o lo’o i ai le atunu’u.

“O lau ia mau i Samoa nei, e leai se mativa, o lo’o tele vaega e mafai ona tua i ai aua le tausiga o le  aiga.

Na ia fa’ailoa o le taimi lenei o lo’o fa’atau fo’i e lona aiga nisi o fuala’au ma isi vaega o lo’o totō i luga o le lauele’ele.

“Ia o si o’u aiga ia o lo’o  fa’atauina le tele o vaega mai le ele’ele e pei ona fa’ailoa muamua atu, ia o le tu’u lava i luga o le palapala.

“A o’o fo’i i taimi e fua ai mago pe a o’o mai fuata mago, ia ona la’u mai lea ua fa’atau i luma i’inei ia ma maua ai lava le tele o le mau tupe aua le atina’eina o aiga.

“O se itu e fa’afetai ia, ia o lo’o sologa lelei lava mea uma.

“E o’o lava le tausiga i totonu o si o matou aiga.

Na ia ta’ua o lea le fa’amoemoega atoa o lo’o i ai le taimi lenei o le aiga.

“Aua o si o tatou atunu’u e pei o le tausiga lava o aiga o lo’o ave ai le fa’amuamua.

“O lea fo’i le mafua’aga o lo tatou ola pea e fa’atino so’o se galuega ia o le manatu lava lea e tasi ina ia aua ne’i ola falolo  fanau.

“O le itu mautinoa, a le minoi ia e leiloa le ituaiga taga e fai ona o le taugata ai o le tau o le soifuaga e pei ona o tatou molimauina nei.

“Ae pei o le tu’u lava i luga o le palapala o so’o se fuala’au ia na ola mai lea mo le fa’aaogaina e le aiga.

By Vatapuia Maiava 07 January 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>