O le tali atu i le taugata ma le faigata ua iai  Samoa o se itu faigata tele.

O lea le saunoaga a le tamā matua o Lepa Lui 63 tausaga o lona soifua mai  le afioaga o Vailoa Palauli ma Nu’u-Fou i le Fofoga o Samoa .

O lona talitonuga e ese’ese lava tupe maua a aiga ma o le tulaga faigata lea i le soifuaga, o nisi e tele latou tupe maua, a’o nisi ua na’o le ma’umaga ma le gataifale.

O lea foi na ia saunoa ai o lona aiga o le isi lea aiga o lo’o fa’apena ona mafatia i le tulaga maualuga ua iai le soifuaga o Samoa.

O lona afafine matua lava ua mae’a ana aoga ma ua faigaluega nei o ia, a’o le isi to’afa o lo’o ao’oga pea.

“Out e talitonu lava a’u ia ua matua taugata lava le tau o le soifuaga ua iai nei Samoa fa’atusa atu i aso ua mavae sa lava le fa’asoa i le $20 i le tele o aiga.

“Ua faigata foi lenei vaitau i le matou aiga ona e matou te fa’alagolago uma i le tupe maua po’o le totogi a si o’u afafine matua o lo’o galue nei.

O le ma’e’a ai o galuega a le tamā i a  Lepa Lui i lana ma’umaga i le aso ananafi ae maua loa lana avanoa e feiloa’i atu I le Fofoga o Samoa.

“A’o le’i faigaluega si o’u afafine matua o le ma’umaga lava sa fai ma fesoasoani i le tausiga o le matou aiga aemaise lava i le fa’atoaga fualaau aina o lo’o iai.

“Ua fai si umi o o’u fa’atau’ina  fualaau’aina i le taumafaiga lava o lo matou aiga ona o le leai o se isi sa faigaluega i lenei taimi.

“Ia o lea la e o’o mai lava i le taimi nei o lo’o ou galueina pea le fa’atoaga ona ou te talitonu e le gafatia e le totogi a si o’u afafine ona tausia matou uma.”

Na saunoa foi Lepa Lui o lea ua amata foi ona ia mafaufau loloto aua a’oa’oga a le fanau i lenei foi tausaga fou.

“E to’alua la’u fanau o lo’o i le Iunivesite ma le isi to’alua o lo’o i le kolisi.

“Ua amatalia foi mafaufauga o le mafaufau po’o fea a maua mai ai se seleni aua latou pili aoga, ofu aoga aemaise latou tupe mo meaai.

“O le olaga ua tatou iai nei ua matua faigata lava ona o le si’isi’i pea I luga o le tau o le soifuaga o le atunu’u.”

Na ia fa’aalia foi le si’isi’i pea lea i luga o tau o meaai ua iai nei i Samoa.

“O le tupe maua ua tatou maua’ina i lenei vaitau e fa’agaga lava mo le fanau aemaise meaai a le aiga.

“Ae o le tau foi o meaai ua iai i totonu o faleoloa ma pisinisi ua matua taugata lava fa’atusa atu i aso ua mavae.”

Na ia saunoa foi ua tatau i lo tatou malo ona silasila ifo i le tulaga ua iai le olaga o Samoa nei i le faigata ua iai nei.

“O la’u maitau atu e ta’itolu lava masina ma fai si’itaga o tau o oloa iinei i Samoa.

“Talosia ae iloa mai e le tatou malo le faigata ua iai nei le olaga ina ia alofa mai ma fa’afaigofie le olaga ua iai nei.

“O le tatou malo e tatau ona fesoasoani mo tatou, ma taumafai e fa’afaigofie mea uma mo tagatanu’u o Samoa.”