A e ola galue malosi mo lou aiga ma lou lava lumanai, e le taumate e tua mai i le lelei.

O le manatu maualuga lea o le Tama ia Tala Wesley, 60 tausaga le matua mai Manono ma Vaitele.

O lo’o faigaluega nei o se leoleopo i le faletupe o le National Bank of Samoa.

I e faamuamua a le tama, o lo’o faamamafa lea mo le tausiag o lona aiga aemaise o lana fanau.

“E ala ona faigaluega le tagata ona o le tupe e tausi ai aiga ma fanau, aua o mea taua a ia I le olaga o soo se tagata” o lana tala lea i le Fofoga o Samoa.

O lo’o aumau le tama i Vaitele i se fale mautotogi aua e latalata lea I lana fale faigaluega,.

“O le faigaluega malosi lava aua se tupe mo pili a le fanau, ma mea fai a le nuu ma le ekalesia ae le gata i lea o mea fai I totonu o aiga.

“E $700tala lana tupe maua mai I lana galuega, o leisi afa o lo’u totogi e ave e fai ai mea a le aiga, ae o leisi afa e teu i le tusitupe aua mea e moomia i le lumanai pei o se fale fou ma mea fai a le fanau.

O lona talitonuga o luga lava o le tagata lava ia ua ala ai ona le maua se tupe aua le tausiga o aiga.

“A ola paie le tagata, ua faapena foi lona ia lumanai.

O lana fautuaga foi lea e fai i lana fanau e taua le ola galue mo le tagata lava ia ma lona aiga.

Na ia taua foi po o le a le taugata o le soifuaga, ua tatou masani ai lava, aua a alu lava I luma le olaga e faapena foi le tau o le soifuaga.

“O le ala lena e taua ai le galue mo lou lava aiga, ma ia mautinoa ia aoaoina lau fanau i mea taua o le olaga, aua a matutua foi latou ia, e faia foi e latou i totonu o latou lava aiga ma le tausiga o fanau.