Mana’omia se fesoasoani
O le maua ai o le avanoa a le Fofoga o Samoa ma le tinā i a Litia Apulu ananafi na ia fa’ailoa ai le tulaga faigata o lo’o ua i ai nei ona o le leai o se suavai maua mo si o latou aiga.
Na ia ta’ua o lea le tulaga o lo’o ua feagai nei ma si o latou aiga ae o le itu faigata ona o le tele o taimi e le maua tele le malosi o le tino.
O le tinā i a Litia e 70 le matua o le soifua ma e to’aono ona alo.
“Ia o le taimi lvenei e fai lava sina tele o tausaga o matou nonofo ma si o matou nei aiga e aunoa ma se suavai maua.
“O se itu faigata tele lea i le taimi lenei , ma o lea lava e taumafai lava i taimi uma e ao le suavai aemaise lava pe a timu.
“E leai lava se tasi e na te leiloa le aoga ole suavai i le tagata, aua e tele ina faalagolago ai le soifuaga e pei ona ua i ai nei.
“I a te a’u lava ia e tatau lava e nai o tatou tagata ona va’ava’ai lelei i so’o se itu mo le lelei alu i luma o le atunu’u.
Na ia fa’ailoa foi o se itu faigata tele ona o fanau.
‘Ia e pei o fanau lava o le isi lava lea mafuaaga, aua ua o tatou iloa uma lava le soifuaga o lo’o ua i ai nei aemaise o le tulaga faigata o lo tatou atunu’u.
“O le itu mautinoa o le le mafai lea ona fa’ao’o atu nisi o vaega aemaise o le suavai maua mo le tele o nai o tatou tagata i letaimi lenei.
Na ia saunoa le manaomia ai o le suavai mo lo latou aiga.
“Ia e pei o lea lava le manaomia o lo’o ua i ai letaimi lenei mo si o matou aiga aemaise ai o le fanau.
“Ua le faigofie lava nei aso, i lo tatou ola ua fai lava ma sii le tau o le soifuaga, ae pei o a mea uma, o le suavai lava o lo’o matua’i mana’omia tele i letaimi lenei.
“O se itu e ao lava ona o tatou va’ava’ai i ai aua le sologa lelei o vaega uma o le soifuaga o lo’o ua tatou ola ma soifua ai.
“O si o matou aiga, ia e manaomia lava le tulaga lea ma o se itu lelei pe afai ae vave maua mai se tala o le suavai.
“O le itu mautinoa e le na’o i matou o lo’o ua ‘a’afia i lea tulaga, o le tele o nai aiga o lo’o ua ‘a’afia ai.