E paiē loa tupu le mala!

By Vatapuia Maiava ma Ilia L Likou 07 October 2016, 12:00AM

O finagalo lea o le tamā i a  Kuresa Fagamalo o Gataivai, 42 le matua o le soifua.

“E le’i leva na ou tōtōina le ava Samoa.

“O nai tausaga ua mavae sa ou maitauina le fiafia tele o le to’atele oi le motu nei i le ava Samoa, pei o ‘i’ina sa ou fa’apea ifo ai o le taimi lelei lava lenei o a’u e fa’ata’ita’i ai po le a se tala mai.

“Ia ona amata loa lea ona ou alu ua aumai ulu ava ma tōtō ma sa le’i faigofie lea tulaga i a te a’u aua e le’i masani mai o laititi.

“Ae ina ua ou selesele ma i le ‘ava, ese le lagona na o’o i a te a’u ona e fai la’u tala e le gata ina fa’atau tele e le to’atele i lo matou nu’u ae a ou sau fo’i le maketi i Salelologa, e le umi lava ae uma.

“Ia na ou fai i lo’u to’alua e le toe fa’aluaina la’u tali i le ava, o le a ou galue loa i ai.

Na ia fa’ailoa i le Fofoga o Samoa o le tupe  e maua o lo’o fesoasoani tele i le tausiga o le aiga.

“Ia e  pei ona i ai lenei taeao, ia lea e le’i taina le iva ae ua alu a’u pepa ava e 5, lea ua $50 le tupe lea ua i la’u taga.“Ia o lea ua maua le tupe ia ae o lo’o titilo fo’i i le aoga , ma mea fai o le nu’u ma le ekalesia, ia o  vaega ua masani ai.

“O vaega lava e tatau ona fa’atino, aua e le tele lava ni tupe e fa’aalu ai ae pei o le tupe tele lava ia o le ‘ai a.

“O tatou o Samoa e fa’apena lava le soifuaga o lo’o i ai nei, o le a le taugata o vaega uma ia ae manana’o lava e fa’atau le vaemoa, ae lae maua le lu’au ma le talo e to’a lelei ai le moa.

Na ta’ua e Kuresa ua savali nei le lua tausaga talu ona ia fa’atauina le ava. “Ia manatua fo’i la e tolu tausaga e tōtō ai le ava, ia a matua ia ua uamai fa’alālā, ona aumai lea ua tu’i mai vaimāmā ma tu’upepa.

“Ia e pei na o le tolu lava aso e fa’atinoina ai vaega uma nei ia ona ave loa lea ua fa’atau.

“O a’u e to’aono la ma’ua fanau ma le tinā o le aiga ma e  to’alua o lo’o laiti ma le to’afa o lo’o i le aoga, ia o la’u ia mau, o le olaga lenei e paie ai loa le tagata , ia o le fia’a’ai le mea e o’o i ai le aiga.

“O le soifuaga i le taimi lenei ua taugatā ae a aunoa ma se galue ia ua tupu le mala.

By Vatapuia Maiava ma Ilia L Likou 07 October 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>