E leai se mea e faigata i le Alii

By Sarafina Sanerivi 07 December 2016, 12:00AM

O le tama ia Fotu Viliamu, 60 tausaga mai le afioaga o Levi Saleimoa. 

O lana galueag o le va’ai lea o le fanua o lo’o iai le fa’atoaga ma le lafu pua’a a lona aiga i le pitonu’u i uta o le afioaga o Levi, Saleimoa. 

Na ta’ua e Fotu, e faigata le nofo ai na’o ia i le nofoaga o lo’o nofo ai nei. 

“O le isi po, na ou fa’alogo atu ai i le ou o maile, ou alu atu loa ma va’ai ae ou tau ai i le tasi o ‘aumatua o lo’o ua lavea lona tua na sogi e le tagata i le agaese se’i tulou.

“Ou alu atu loa ma si’i mai i luga, ae ua ou te’i i le famai o le tagata, ae ou autilotilo atu e to’atolu lelei tagata o lo’o iai ma fa’apea mai ia te au, “e filifili a’u pe fa’asao lo’u ola pe tu’u atu le ‘aumatua.”

“O’u tatalo loa i le Ali’i ma fa’apea atu, e sili ai le tu’u loa o le pua’a ae fa’asao lo’u ola.”

O le nofoaga o le tama ia Fotu, ua na’o le suavai lava e leai se eletise. 

Ae e ui lava i lea, na ta’ua e Fotu, e leai lava se mea e faigata pe a fa’atuatua i le Atua. 

“E leai lava se mea e popole ai. E mo’i lava e fai si maomao mai o lenei nofoaga, ae lagona lava le mafanafana o le Atua. 

“O a’u ia, e fai lava a’u feau i totonu o le fanua lenei ma va’ai pua’a. E ta’ilua vaiaso fa’ato’a ou oo i tai i le aai i le mea o iai isi o matou aiga. 

“Mo a’u mea’ai, e lava a a’u i le fa’alifu fa’i ma le ti. Seiloga lava o le aso Sa, fa’atoa ai loa lea o se mea lelei.”

O le nofo faigaluega ai o Fotu i le fanua o lo’o alala ai nei, e ta’i $100 ana tupe e maua i le vaiaso. 

Ma o lea tupe e fa’aalu lea i le fa’atauina o popo a pua’a, totogi ai le ta’avale e la’u mai ai le popo ia ma le suka o le afiafi. 

“E pau lava le faigata o le galuega nei o le su’eina lea o popo a pua’a. Ae o la’u nofo ai iinei, e mo’i lava e faigata i le va’ai a nisi, ae ua ou masani lava ma maua lo’u fiafia iinei. 

“A fa’alagolago lava i le Atua, e manuia lava mea uma e fai, e maua foi le mafanafana ma le malosi e fa’atino ai feau. 

“O le olaga lenei tumu lava i fa’afitauli ma faigata. Ae a pipi’i ma tumau i le Atua i le tatalo, e manuia lava mea uma e fai. E leai se mea e faigata i le Atua.”

By Sarafina Sanerivi 07 December 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>