E o fa’atasi le tatalo ma galuega

Tusia Vatapuia Maiava ma Sarafina Sanerivi ,

49 Hits

Le tama ia Sefo Filipo, 61 tausaga mai le afioaga o Tuana’i.

Le tama ia Sefo Filipo, 61 tausaga mai le afioaga o Tuana’i. (Photo: Misiona Simo)

“Galue malosi ma fa’atuatua i le Atua, ona manuia lava lea o mea ete faia.”

O lea le finagalo o le tama ia Sefo Filipo mai le afioaga o Tuana’i. 

Na ta’ua e Sefo po’o a lava faigata o lenei olaga, e lua lava mea e maua ai lo tatou fesoasoani moni, o le fa’alagolago lea i le Atua ma le galue e aunoa ma le fa’alogologo tiga. 

“O le olaga lenei e leai lava ma se mea e faigofie. E faigata uma lava mea, e iai lava aso e lelei ai, e iai foi aso e leaga ai.

“O le ola finafinau lava e manuia ai le ola. A nofonofo ma le faia se galuega, e iu ai lava ina tigaina ma fetaiai pea ma fa’afitauli.

“Ia o a’u ia, e taumafai lava i so’o se mea ina ia manuia ai si a’u fanau ma lo’u aiga. 

“E a la ona matitiva tagata, o le le galulue. O le tagata lava ia e ala ai ona tigaina.

“A taga’i nei i meaalofa a le Atua i o tatou tagata, o lo’o tele lava fa’amanuiaga a le Atua moi tatou. O lo’o iai koko, talo, fa’i, ta’amu ma isi lava mea.

“E leai se mea e fa’alagolago ai fua i isi tagata. E tu lava le tagata ia mo ia lava.”

Na ia ta’ua foi, o le to’atele o nisi, e ola fa’alagolago i isi tagata e sa’ilia mai manuia mo aiga.

“A le tali mai loa la tagata na, ona tupu loa lea o le fa’aletonu. E pei ona faiatu i le amataga, e mafua lava le tigaina ma le oi ona o le le galulue.”

O le tama ia Sefo, o lo’o faia lana maketi i tafa ala o le alalafaga o Tuana’i, ma na ta’ua e Sefo, ua tele le fesoasoani a lenei maketi mo ia ma lona aiga.

“E totogi lava le $5 i aso uma, e fai lea i a matou fa’aputuga tupe aua foi nisi tulaga e mo’omia. E sili atu lea ia te au nai lo’o le ave i le maketi i le taulaga e tele foi isi tupe e alu ai.

“O le alumia ia o mea o lo’o fa’atau i luma o la’u maketi ma o le auala lea e fa’afetai ai i le Atua. 

“O le matou fale foi o lo’o iai na faia mai i le seleni na maua mai i le maketi lenei. 

“O le isi tulaga, o ii o lo’o maua mai ai le tupe e tautua ai i le Ekalesia. Ma o le ala foi lea e maua mai ai fa’amanuiaga, ona o lo’o toe ofoina atu lea e tautua ai i le Atua.”

© Samoa Observer 2016

Developed by Samoa Observer in Apia