Sauniga Fa’afetai a le H.R.P.P. i le Aso Sa

08 March 2016, 12:00AM

Ripotia e Deidre Fanene

Fa’aliliu e Maiava

 

O le taeao o le Aso Sa, na potopoto uma ai sui-faipule a le Vaega Fa’a’Upufai e Puipuia Aia Tatau a Tagata (HRPP) e si’i fa’atasi le Vi’iga ma le Fa’afetai i le Atua, i le Maota o le HRPP i Mulinu’u.

O lea sauniga tu’u-fa’atasi, na ta’ita’ia e le Faife’au Toea’ina Malolo Manumalo o le Ekalesia Fa’apotopotoga Kerisiano Samoa, le Susuga a Peleti To’ailoa.

Sa fa’ala’ei’au le ta’ita’i i sui uma sa ‘auai, ina ia fa’amuamua pea le Atua i taimi uma, aua o Ia lava o le Foafoaga o mea-lelei uma. 

 “Ua filifilia ‘outou uma e Le Atua, e avea ma ta’ita’i o tagata, o ta’ita’i fo’i o le atunu’u,” o lana saunoaga lea.

“E ao ia ona outou ta’ita’i ma le alofa, ta’ita’i ma le fa’amaoni. Na filifilia ‘outou e tagata o outou itumalo, ona ua ia te ‘outou lo latou fa’atuatuaga ma lo latou talitonuga. 

“O le finagalo lea o Le Atua ua fa’aalia – e ala i finagalo fa’aalia o tagata o le atunu’u. 

“Ae ‘aua lava ne’i galo, fa’amuamua Le Atua, ona ta’iala lea o Ia ma fa’atonutonu-folau, i au fuafuaga uma o le a faia.” 

O le Afioga a La’auli Polata’ivao Fosi – o le sui o le Vaega Fa’a’Upufai sa avea ma fofoga o lea aso i le Maota o Petesa.

Na fa’aalia e La’auli, o le tolauapiga e vaiaso atoa o le a alo iai le HRPP, o faiga-masali lava ia pe a mae’a faiga-palota tele a le atunu’u. 

“Sa ‘ou ‘auai i le faiga masani nei a’o ‘ou la’ititi, a’o iai lo’u tama i le Palemene mo tausaga e 40 ua mavae, ma o lea la ‘ou te malamalama lelei i le mafuaga o le tolauapiga lea,” o lana fa’aaliga lea. 

“Ae mo sui fou, o se taimi e mata’itu ai ma fa’amasani i faiga ma aga fa’aHRPP, ma avea o se sui o lenei vaega ma avea o se tino e tasi pe a o’o i le Palemene.” 

O nisi nei o ata sa pu’eina mai lea sauniga i le Aso Sa.

08 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>