Fai mai ua le mafaufau le Palemia ma le taofi o le faafiafiaga

By Joyetter Luamanu - Samoa News 09 June 2016, 12:00AM

O le  “Le Mafaufau” o se faiga lea na faamatala ai e se tasi o le ‘Au Faafiafia a le Afioaga o Leone-le faiga a le Palemia o Tuilaepa Sailele Malielegaoi-ina ua tulai mai i le faagasologa o le latou faafiafiaga i le faamanatuina o le Aso o le 54 Tausaga o le Tutoatasi ma poloaiina le latou ‘aufaafiafia ina ia taofi, ona ua sili atu lo latou taimi i le taimi faatapulaaina, e 20 minute. 

O lenei faaupuga ma isi lava manatu faaalia faapena-na faailoa atu i le Samoa News ina ua taunuu le vaega faafiafia i le uafu i Fagatogo- lea sa malaga atu i le Lady Naomi. Sa malaga faatasi  le afioaga o Leone ma le Tamalii o Leone-o Fa’ivae Iuli Alex Godinet-lea na ia faamaonia e faapea sa le malilie tagata i le mea na fai e le Palemia. Ae ui o lea-na latou talia ma le faaaloalo le talosaga a Tuilaepa ma faamuta ai loa le latou faafiafiaga e ui lava ina e le’i mae’a. 

Sa faaalia e Fa’iivae i le Samoa News, o lo latou manatu e faapea ona o i latou o ni “malo faaaloalogia” i le faamanatuina o le Malo Tuto’atasi o Samoa, o lea o le a maua ai so latou avanoa, ae peitai-e leai se tulaga faapena.

E ui lava la ina le fiafia nisi o le ‘au-faafiafia, ae fai mai Fa’iivae-e tatau ona latou faaaloalogia le talosaga, talu ai-“ua na o i matou lava o ni malo.”

E tusa ai ma Fa’iivae, o le komiti o le Aso o le Tuto’atasi o Samoa na o’o atu ia i latou ina ua latou faato’a taunuu mai i Samoa-ma faailoa atu ia i latou e tatau ona latou faafiafia i le polokalame atoa mo le komiti ma o le taimi muamua lena na latou faalogo ai e faapea o le “Pese & Siva” sa tatau ona na o le 20 minute. 

.Sa faaalia e Fa’iivae e faapea o lo latou tusi valaau, lea na fai sa’o lava i le Afioaga o Leone, e mo latou e faafiafia ai e ala i le latou Pese & Siva ma aumai lo latou fautasi. Sa mulimuli ane ona tonu i le Palemia o le a leai se Tuuga Fautasi i lenei tausaga. “Sa leai lava nisi faatonuga e uiga i le taimi faatapulaaina, ma e leai se faiga e mafai ai ona matou faia la matou siva atoa ma le pese i totonu o le 20 minute. Ae ina ua logo mai matou, sa matou taumafai e tausi i o latou mana’oga.”

Fai mai Fai’ivae na ia faailoa atu i le Komiti, “O le a matou faia le mea sili matou te mafai ona fai ma afai tou te finagalo e faapuupuu lo matou taimi, e mafai lava ona outou tipi ese matou.’ Ae peitai, o lo’u lava manatu o i matou o malo valaaulia ma o loo fai i matou ma sui o Amerika Samoa ma e faapea foi ma le auai o le Kovana o Lolo (Matalasi Moliga) Sa ‘ou manatu ma le talitonu atoa o le a faatagaina tatou e faatino la tatou faafiafiaga, ae ua manino mai e leai ma o Tuilaepa lava na taofia tatou.” 

Sa faailoa atu e isi sui auai o le vaega faafiafia i le Samoa News e faapea a’o lumana’i ai lenei tulaga-e le masino taimi na valaau mai ai le Pule o Sauniga e faapea ua latou sopo’ia le taimi faatapulaaina. Sa faaalia e Fa’iivae e faapea o le faiga a le Palemia ua faaalia ai le leai o se faaaloalo i le Kovana, sa mulimuli ane ona faafetaia e Fa’iivae le Palemia o Samoa mo le avanoa na tuuina atu ia Leone-e ui lava i lea tulaga na tupu mai.”

I le tulaga aoao-fai mai a ia, o se aso uiga ese lea mo Leone ma e faafetaia e lo latou nuu ona ua mafai ona latou faafiafia i totonu o Samoa.

E tusa ai ma Fa’iivae, o nisi o tagata i Samoa, sa le fiafia i le faafiafiaga a Leona ona ua faapu’upu’u “ma ou te ioe i ai, sa le tatau lava ona fai faapea tatou, aemaise ai lava ona o le faagasologa o la matou Aso o le Fu’a, o nuu mai Samoa ia e o mai ia i matou, matou te le faia faapea i latou e pei o lenei faiga, e leai se taimi faatapulaaina. “Sa matou tuu atu lava latou e fai soo se mea latou te loto i ai, ae ina ua taunuu mai Leone i Samoa, sa saili matou e le komiti, ma talosagaina lo matou faia o se matou pese atoa ma le siva mo le komiti.”

Fai mai Fa’iivae ina ua mavae ni talosaga se tele mai le komiti, sa latou talia ma faailoa atu, “E lelei foi mo le komiti ona latou pasia la matou pese ma le siva ma afai tou te le mananao i ai-o le a toe teu a matou aso ma toe foi i o matou aiga, e matua faigofie lava e pei o lena.” Fai mai a ia o le vaega tele o le 300+ o le aufaafiafia a Leone sa le fiafia ae peitai- e leai se mea matou te mafaia, “o le Aso o le Tutoatasi o Samoa ma o a latou lava tulafono.”

Ina ua fesiligia pe sa fai ni faaaloaloga tau Sua, sa faailoa atu e Fa’iivae i le Samoa News na faatino lena tulaga  mulimuli ane ma e leai se faaseā e uiga i le taimi na faaaogaina mo lea fuafuaga.  

Sa faaalia e Fa’iivae le faafetai i le Kovana o Lolo o ia lea sa auai mo le taimi muamua i le Aso o le Tuto’atasi o Samoa. I taimi ua alu o lea sauniga faamanatu sa aso faatasi ma le faauuga a Aoga Maualuga i Amerika Samoa ma o le tele lava o tausaga sa faasili ai  e le kovana faauuga.

Fai mai a ia na malaga mai le kovana ma asia lo latou nuu lea sa to-lauapi i se nofoaga o le Ekalesia Katoliko i Moamoa, ma o lea matou te matua faafetaia ai le avea o i latou ma talimalo lelei ma ua avea “nei i latou ma aiga.”

By Joyetter Luamanu - Samoa News 09 June 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>