Faatau koko esi mo se manuia o le aiga

By Ulimasao Fata 09 November 2017, 12:00AM

E leai se isi alofa e sili atu nai lo’o le alofa fa’a Tina.

E na te mautinoa ua aai lana fanau tusa lava pe i ai sana mea e taumafa.

Feiloa’i atu i le Tina ia Ana Kuresa mai le afioaga o Nu’u Fou, o lo’o fa’asavali lana Koko Esi e tausi ai lona aiga.

Na feiloa’i atu le Fofoga o Samoa i lenei Tina a’o aga’i atu o ia ma lana fanau e to’alua e fa’asavali le koko Esi i le aso ananafi.

Na taua ai e Ana Kuresa i le Fofoga o Samoa faapea o le fa’asavali ina o nei gasesega ua na’o le pau lea o le tupe maua o lo’o ola ai le latou aiga.

“Ua fai si leva talu ona ou faia lenei galuega o le kulei ina lea o nei gasesega ona ua na’o le pau lava lea o le auala o lo’o manuia ai le matou aiga.”

“O le aso Lua lava ma le Aso Lulu o aso ia e fa’asavali ai le Koko Esi, ae o le aso To’ona’i e sui ai i le Faausi.”

Na taua ai foi e le Tina ia Ana Kuresa le taugata tele ua i ai nei le soifuaga o Samoa.

“O le seleni e fa’apena ona ou mauaina mai e $80 lava i le aso vagana ai le aso To’ona’i e maua ai se tupe ova atu ma le $100.”

“O le matou aiga e to’a sefulu tagata, o maua ma le Tama o le aiga ma le fanau e to’avalu. O le ulumatua ua fa’apena ona fai lana aiga ma ua me’i atu ai ma ia, ia ae to’afa lea e aooga ma le to’atolu lea e aooga i le tausaga fou.”

Na saunoa foi le Tina ia Ana Kuresa i le mea o lo’o fa’aalu ai lana tupe maua aemaise le mea o lo’o fa’aaoga ai lana seleni.

“O lenei seleni e fa’aalu lava i le fanau aemaise matou meaai, ia e fa’aaoga foi lenei tupe e fa’atau ai mea mana’omia i le aiga pei o suavai ma le eletise.”

Na toe saunoa foi le Tina ia Ana Kuresa i lona naunautaiga o lo’o iai aua le lelei o lona aiga ma lana fanau.

“O la’u lea naunautaiga ia lelei aoga a lata fanau ina ia tali mai i le tautiga o lo’o fai nei i vaiaso uma lava.”

“O lea foie naunau ia lelei a latou aoga ia maua ni galuega lelei e sili atu nai lo lea mea ou te faia.”

By Ulimasao Fata 09 November 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>