A’oai lelei fanau i ala o le Atua

Tusia Vatapuia Maiava ma Sarafina Sanerivi ,

100 Hits

O FANAU O LE TOFI MAI LE ATUA: Sieni Talaifaga mai le afioaga o Fusi Saoluafata.

O FANAU O LE TOFI MAI LE ATUA: Sieni Talaifaga mai le afioaga o Fusi Saoluafata. (Photo: Sarafina Sanerivi )

“A’oai le tama e tusa ma ona ala, a o’o ina matua, e le toe te’a ese ai.”

O lea le finagalo o le tina ia Sieni Talaifaga mai le afioaga o Fusi Saoluafata.

O le tina ia Sieni ua 70 le matua o lona soifua, ma na ia fa’ailoa mai i le Fofoga o Samoa, ua tele lava le suiga o Samoa ua iai nei. 

“O le suiga lava lea ua iai i lenei taimi mo a’u lava ia, o le lē toe tutusa ai lea o le malosi e maua.

“Ua sau lava le matua o le soifua, ua le toe pei o aso a’o talavou.”

Ae peita’i na ia ta’ua, e le’o avea lea ma ala e taofia ai lona soifua galue.

“O le taimi lenei, e ui lava ina ua matua, ae o lo’o faia lava a’u fe’au ma o lo’o fesoasoani foi i fanau i nisi o fuafuaga i totonu o aiga.”

E le gata i lea, o le isi suiga na ia ta’ua o le tulaga lea i amioga a le tupulaga i lenei vaitau.

Na ta’ua e Sieni, e taua lava le pitola’au a matua o le a’oa’i ma fa’atonu fanau i ala e tatau ona ola ma savavali ai.

“E le gata la ina a’oa’i fanau, ae tatau foi i matua ona fa’ata’ita’i ma fa’asino i fanau le ala tonu e tatau ona savavali ai.

“O le vaitau lenei, ua tele lava ina leaga amioga a fanau. A fa’atusatusa atu i la aso, ua le toe tutusa lava ma ua fa’afaigata lava ona fa’atonutonu amioga a fanau.

“Ae fa’afetai i le Atua ona o le tele o auala ua ia foa’i mai e mafai ai ona fa’atonutonuina amioga a fanau. 

“Fa’afetai foi i le Atua mo lana tausiga ma lana puipuiga  i fanau.”

E le gata i lea, na ta’ua foi e Sieni, o le isi mafua’aga o le tele ai o suiga ona o aga ma tu mai fafo.

“Ua tele lava le mau mea fou ua ofi mai i totonu o le atunu’u i lenei vaitau.

“E pei lava ona ta’ua i le amataga, ua tele lava suiga o le olaga ua iai i lenei vaitau.”

Na ia ta’ua foi, o le tasi o fa’afitauli o lo’o aafia ai tupulaga i lenei vaitau o le alualu lea  iluma o le fuainumera o i latou o lo’o pule i le ola.

“Ua to’atele lava i latou ua manatu o le tali lea i o tatou fa’afitauli.

“Ae leai, o le Atua lava o lo’o iai le tali o fa’afitauli uma. O le mea lea e tatau ona taga’i iai matua o fanau ia.

“O fanau o le tofi mai le Atua, e tatau i matua ona tausia lelei fanau ma fa’atonu i le ala sa’o e tatau ona ui ai.

“A a’oa’o fanau mai le laiti i le ala tonu e tatau ona savavali ai, e le toe te’a ese ai pe a matutua.

“O matua lava o faiaoga muamua ia o fanau, a fa’atonu i ala o le Atua, e le toe o ese mai ai fanau.”

© Samoa Observer 2016

Developed by Samoa Observer in Apia