O le fua e te lulu, e te toe seleseleina
O Aitupe Leuta, o se tamā mai le afioaga o Ta’elefaga i Fagaloa.
I le fa’atalatalanoaga a le Fofoga o Samoa ma le tama ia Aitupe, na fesiligia ai mo sona finagalo i le tulaga o lo’o iai le soifuaga i Samoa i lenei vaitau.
Na ia ta’ua ai o lo’o lelei lava mea uma i Samoa.
Ae peita’i na ia ta’ua e sili atu lava ia te ia le olaga i nu’u i tua nai lo’o le taulaga.
“E manaia lava ia te a’u le olaga o lo’o iai nei i tua i nu’u i tua ia te a’u lava ia. O a’u ou te sau mai Fagaloa.
“O le mea e manaia ai le olaga i Fagaloa ia te a’u lava ia, ona o lo’o o’u nofo lava a’u ia i lo matou fanua e sa’oloto ai ma ai ai so’o se mea e mana’o iai.
“E le alu se tupe e tau totogi ai se fanua ma fale e nonofo ai. O le isi tulaga, e le’o alu se tupe e totogi ai le suavai maua i si o matou alalafaga. Na’o le pili lava o le eletise, ma isi fuafuaga, ae e le’o alu se tupe e totogi ai le suavai.”
Na ia ta’ua, o le atina’e lava o lo’o fa’amoemoe iai aiga o le nu’u o Fagaloa o le totoina lea o le ava Samoa. “Tusa lava pe leai ni galuega ma matou le faigaluega, ae a lelei le toga’ava, e leai lava se mea e popole ai.
“O le alagatupe tele lava lena o lo’o fa’amoemoe iai aiga isi o matou nu’u.
E leai lava ma se mea e popole ai. Na pau lava le tulaga e popole ai o lou le galue ma tinou e saili auala e maua ai seleni mo lou aiga.
“O le tulaga foi i totonu o le matou nu’u, o mea ia o lo’o maua ai tupe e fai ai fale ma maua ai ta’avale a nisi o aiga.
“A lelei lava ma fa’amaoni i le faiga o le togā’ava, e manuia foi aiga ma maua mea e tausi ai aiga ma fanau.
“O le isi tulaga, o lo’o latalata foi le sami e tua iai aiga mo mea taumafa. E faigofie lava le olaga i si o matou pitonu’u.
“A lelei a na fai le ‘ava, e lava ma totoe lena e fa’amoemoe iai le atina’eina o aiga. A o’o foi lava ina kiliva ‘ava, e kiliva lava le ‘ava a le tagata ia.
Aua e toeitiiti lava tofu uma aiga ma a latou toga’ava. E alu lava la le tagata e kiliva ana ia ava i faleoloa ese’ese i totonu o Apia.
“O le isi taimi e oo i Falelatai ma Falealili. A o’o la ina kiliva, e fa’amoemoe lava le lelei o le tupe e maua i le tele o au pepa ‘ava e maua.
“A lelei lava ma tele lou toga’ava, e tele foi le seleni e te maua pe a oo ina kiliva. A kiliva pepa ava e 100, ua maua lau $800. Ae a oo i luga o le afe pepa ‘ava e te kilivaina, e maua lava se seleni e silia atu ma le lima afe tala aga’i luga.”
E le gata foi i lea, na ia ta’ua o le mea lava e tatau ona manatua i le olaga lenei, o le fua lava e te luluina o le fua foi lena e te toe seleseleina.
“E fuafua lava le tupe e te maua i lau gaioi ma le tele o au pepa ava e kilivaina.
O le tele foi o fa’alavelave e feagai ai ma aiga, o le toga’ava lava o lo’o fa’amoemoe iai. E sili atu lena nai lo’o le faigaluega.
“E maua mai lava tupe ma teu i le faletupe ma maua mai ai le fesoasoani mo aiga.”