Sui ‘ona fa’alagi, a’o le tamaloa lava e tasi

10 March 2016, 12:00AM

Tusia - Mata’afa Keni Lesa

Fa’aliliu e Maiava

 

E mata’ina lava mea e tutupu. Sa manatu o le a matua olo-le-fua ma tu-tafagaloloa le HRPP i le Palemene o Samoa, talu le olopalaina o le Tautua i le Aso Faraile talu ai, peita’i, lele ua toe fo’i mai le tamaloa sa fiafia iai le to’atele, ua vaeseuga fo’i o gagalo atu. 

E le tau fa’ailoā, aua e ui ua toe taliu mai i le Palemene i se suafa ‘ese, ‘ese fo’i le itumalo ua tula’i mai ai, peita’i o lo’o mau pea le ma’ati’ati o le moe ma le utaga-mamao lea na lagi-fa’apese ai ona vi’i i ona ulua’i taimi i Upufai-o-malo. 

Sa’o lelei, o ‘Olo Fiti Va’ai lea e talanoa iai.

O le mea moni a, sa fa’apea ua gagalo atu lava i lena tausaga ma le-toe ta’ua, ina ua fa’aleaogaina lona tofi, o le faipule o Gaga’emauga Numera 2, talu ai fo’i le mau gaogaosa o tulafono fa’aPalemene.  

O le taimi lena – a’o silafia i le suafa o Levaopolo Talatonu – na toto’a ai lana fa’ai’uga e sui le itumalo e tauva mai ai – ae sa manatu fo’i nisi, e au ina fa’alue ane i le nofoafi a le HRPP e pei ona tele iai le mau masalosaloga. 

Peita’i, e leai se mea fa’apena e pei ona tatou iloa nei.

O le tula’i mai o le Faipule fou mo Salega i Sasa’e, o se fa’aola-totoga tele, talu ai le fa’aletonu na iai i le Aso Faraile, na toetoe a fufulu ai le Vaega a le Tautua Samoa.  Pe e te alofa iai pe leai ai, ae ao lava ona ‘ave iai le fa’amalo, ona o le tu-malosi mai e tau-tulei le ta’avale ua tau le-migoi. 

Ae moni ai ali’i e ma tama’ita’i, e leai a se faigata e liliu ai ‘Olo i le isi itu.

Pe fa’ataligatuli fo’i ma tu-tu-mamao mai ona o le mala-paga ua o’o iai taumafaiga a le Tautua. 

Peita’i, lea ua tula’i mai le tamaloa i lona suafa ‘Ola e fa’amalosi ma toe tau-faufau le sa ua fa’i. O le tulaga ua fa’alogo ma va’ava’aia fo’i iai, pei a e le’i alu le tamaloa. 

Na saunoa mai i le Samoa Observer, ua fa’anoanoa ona o le tulaga ua iai nei le Vaega a le Tautua ma ua fiafia ai lava e toe fa’atasi atu i sui o le Tautua, o ‘A’e’au Peniamina Leavaise’eta mai Falealupo ma ‘Ili Setefano Ta’ateo o A’ana Alofi Numera 2. 

 “O le fa’anoanoaga sili i fa’ai’uga o faiga-palota nei, ona o le a leai se Itu-Agai,” o le fa’aaliga lea a ‘olo. “O le mea lea sa ‘ou talanoa atu ai lava i sui-fa’atutu ina ia aloa’ia ma ‘ave le fa’amuamua i le Palemene, ae le o faiga-vaega.” 

O le fa’aaliga a ‘Olo, e tele taimi na tauanau ai o ia ia ‘auai atu i le HRPP.

“Ae le mafai ona ‘ou uia le ‘auala lea ona o ni taui ma ni fa’amanuiaga. ‘Ou te tumau pea i lo’u talitonuga ma mulimulita’i i le mea e iai lo’u fatu aua ‘ou te iloa, o lo’o ia te ‘au ‘aupega mai Le Atua ‘ou te mo’omia, e tau ai le taua.” 

La lea la le atunu’u e. Atonu o lo’o silafia lelei e ‘Olo nisi o sui i totonu o le HRPP, i latou tatou te le o iloa. Po’o le a lava, tatou te malamalama lelei i mea o lo’o saunoa iai. Ae mafanafana lava aua o lo’o iai lava tagata e mausali pea ma mautu i o latou talitonuga – ui e na o latou o ni faipule.

Mo le aga’i i luma, na saunoa ‘Olo, o le a silasila toto’a i lona sao, o se tasi o “le ‘autau-to’atolu” o le a fetaui ma le malosi o le malo. 

Ae le faigofie. To’atolu e feagai ma le 44, e matua le-talafeagai lava.

Na fa’amanino fo’i e ‘Olo, e mo’omia lava ona fa’amanino ma fa’amalamalama i le atunu’u lautele, le sao o le itu-agai i so’o se malo temokalasi. Na ia toe manatua le taimi ole fonotaga mulimuli a le Palemene talu ai, na matua faitioina ai e le to’atele o le atunu’u le tulaga o le itu-agai i le tele o mata’upu ogaoga sa laga.

 “Sa ‘aumai a latou faitioga i le itu-agai, a ua a nei, lea ua palota ‘ese mai sui o le Itu Agai,” o lana saunoga lea. 

“O se popolega tele aua, o le mea lea ua iai i le taimi nei, o le mea lava e mana’o iai le malo, e fa’atino lava e aunoa ma se popole ona ua leai se itu-agai.” 

Na maua fo’i le avanoa e momoli ai lana fa’afetai ma mo’omo’oga alofa mo le sa ta’ita’i i le Tautua Samoa, o Palusalue Fa’apo II ma fa’amalo fo’i i le Ali’i Palemia ma le HRPP ona o le manumalo a’ia’i i faiga palota. 

Mo le aga’i i luma, na fa’amanino lelei mai e ‘Olo lona fa’amoemoe.

“Pau la’u tala e fai ia latou uma nei, ‘aua le o-mai fa’atasi, ae o-mai ‘auaua’i. 

Atonu o le a fa’afaigata i le HRPP ona tau fuafua se faiga e fa’afilemu ai le Faipule Salega, ae maise fo’i pe a manatu i lona suafa o ‘Olo.

Ia ‘Olo, alo i ou faivamanaia! 

10 March 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>