To’alua ua maliliu i le Dengue Fiva i Papua

By Fa’aliliuina e Ilia L Likou 10 April 2016, 12:00AM

 O lea ripoti na fa’amaonia mai e le Post Courier lea o lo’o latou ta’ua ai le fa’ateteleina o le pipisi o lea fa’ama’i i totonu o lenei atunu’u.

Na fa’aalia foi ma fa’amaonia mai e le Minisita o le Soifua Maloloina o lenei atunu’u i a Michael Malabag lea tulaga.

Sa ia ta’ua e 37 i latou ua fa’amaonia ai le a’afia ai i lenei fa’ama’i ma e tele i latou o lo’o ua maua i siama o lenei fiva mai vaega o le atunu’u e igoa o Daru ma Kiunga.

O le taimi o lo’o galulue pea i se tulaga vave e fa’aitiitia ai lenei fa’amai i totonu o lo latou atunu’u.

I le lua tausaga talu i le ma’ea ai o le tetele o lologa ma tafega i totonu o Solomona na tele ni  ‘a’afiaga o tagata o lea foi atunu’u  i le Dengue Fever.

I nai tausaga e le’i leva atu  na o’o atu ai le fuainumera tele i le tala fa’asolopito lava i totonu o le atunu’u lenei o Solomona i se tasi o  a latou saili’iliga lea na ma maua ai le masalomia ai lea o le 223 o i latou na maua e siama o le Dengue Fiva.

Sa fa’ailoa mai e se tasi o sui  i a Chang Moh Seng o  le Fa’alapotopotoga o le Soifua Maloloina i le lalolagi lea tulaga i se fa’atalatalano’aga ma sui fa’asalalau o Solomona.

O le tula’i mai ai o lenei fa’ama’i na avea lea ma se popolega tele o i latou na o latou mata’ituina lenei tulaga i totonu o Solomona, ma o lo’o ua talosagaina pea e lenei atunu’u ni fesoasoani mo tau vaila’au mo le tineia ai lea o le Dengue Fiva.

O le vaega e pito sili ona fa’amata’u i lenei fa’ama’i  e pei ona ta’ua e le foma’i i a Chang ona o le vave ai lea ona pipisi ona o le siama e feavea’i e namu.

 “O lenei siama po o le vairasi fo’i e igoa o le Aedes o lo’o feavea’i e namu ma e tele lava ina fai gaioiga a namu o lo’o i ai lea siama i tino o tagata i le aoauli ma le taeao”

O le ola tumāmā ai o tagata o se vaega o lo’o ave i ai le fa’amuamua i le taimi nei, ma ua logo uma fo’i tagata o le atunu’u mo ia vaega e ao ona fa’atinoina.

 “E pau le tulaga e ao ona faia e tagata ina ia fesoasoani ai i le fa’aititia ai o le fa’ama’i, ia fa’amama vaega uma e ono tu’ufua ai namu ma ia fa’aaogaina vaila’au e fana ai ia nofo’aga uma ina ia fa’atama’ia ai namu nei”

O le itū fo’i lava lea e tasi na saunoa i ai le Fa’aulu’uluga o se tasi o vaega o le Matāgaluega o le Soifua Maloloina i totonu o Solomona i a Alison Sio, lea na ia ta’ua le galulue fa’atasi ai lea ma le Fa’alapotopotoga o le Soifua Maloloina i le lalolagi i le fa’atinoina ai lea o galuega uma auā le saogalemū o ona tagata.

O le tele ai o ripoti na tu’uina atu e fa’atatau i lea fa’ama’i na fa’ailoa mai nei e se tasi o kamupani i totonu i Farani  e igoa o le Sanofi Pasteur  le mafai ai lea e se tasi o a latou vaila’au gaosia  ona fa’aitiitia ma tineia siama o le dengue fever.

Sa fa’ailoa mai e le fa’auluuluga o le Sanofi Pasteur i a Oliver Charmeli e fa’apea o lo’o manana’o ina ia i ai lava se vaila’au fa’apitoa mo le vave togafitiga ai o le siama o le dengue i le lalolagi atoa, ma o le fa’amaonia ai la o lenei vaila’au o se fiafiaga tele lea i a’i latou o lo’o galulue mo lea tulaga.

O lenei vaila’au sa muamua lava ona fa’ata’ita’iina i totonu o Indonesia, Meleisia, Filipino, Thailand ma  Vietnam i tamaiti o lo’o ‘a’afia i siama o le dengue lea e ova ma le 10,000 i latou o lo’o ‘a’afia ai ma e 56 pasene na mafai ona toe manuia ai ma o le taimi lenei o lo’o ua fa’asolosolo atu togafitiga i totonu o Amerika.

E pei ona silafia ai o se tasi lenei o fa’ama’i o lo’o ua ‘a’afia ai le Pasefika lea na maitauina ai  le pipisi ai o ana faiga i totonu o Fiti, ma na fautuaina e le Soifua Maloloina o Fiti ona tagata uma i le unaia o vaega uma ina ia nofo uta lelei i ai, ona o lea ua o latou vaaia le ogaoga ma le matuia o le pipisi ai o lenei faamai i totonu o Fiti ma ua o’o atu ai lava i le maliliu o ona tagata.

Na mafai ai fo’i ona fautuaina ai le Vaega o le National Surveillance i le Matagluega o le Soifua Maloloina fa’atino se tulaga mo le malu puipuia o le mamalu o le atunuu. 

I se faaiuga o lenei tulaga, na unaia ai le Matagaluega o le Soifua Maloloina a Fiti ina ia o latou mautinoa lelei o le a le mafaiona toe aafia se tasi i lenei faamai. 

Na taua e le Matagaluega o le Soifua Maloloina, ao fau ma soloi ai auala e foia ai lenei faamai o le dengue fiva, o le sini autu lava ma fa’amoemoe taua, o le tumama lea i lou siosiomaga lea e aofia ai le faamamaina o fanua, o alavai, o pau ta’avale o loo toa ai vaivai ia ma le suavai palapala o loo i autafa o fale. 

E le gata i lea, e tatau i tagata uma ona o latou mautinoa ni vai o loo toa i luga o fale e tatau ona faamamaina, ia poo nisi foi o lua o vai o loo latalata ane. 

O le taimi lava e aafia ai se tagata se to’atasi i auga o lenei dengue, o lona uiga, o le a matua aafia uma tagata uma, ma pipisi atu i le isi tagata, i totonu o le 4 i le sefulu aso. 

O auga o lenei faamai e aofia ai le fiva, tiga le ulu, aemaise lava i luma o mata, tiga soona o ponaivi, pepe le tino, lima ma vae, faapea ai ma le toto e sau i totonu o le gutu poo le isu, o na a’afiaga a maua ai loa se tasi, o lona uiga ua maua i le dengue fiva, ma ia tatau ona vave vaai se fomai.

By Fa’aliliuina e Ilia L Likou 10 April 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>