Fa’afotutupu le suafa Fuimaono i Lefagaoalii

Tusia Deidre Fanene ,

268 Hits

Fuimaono Vaipapa ma lona aiga i le aso o lona fa’amoemoe.

Fuimaono Vaipapa ma lona aiga i le aso o lona fa’amoemoe.

O le Aso 2 Iuni, 2018 sa fa’afotutupu ai le suafa Fuimaono i Lefagaoalii, Savaii i le Maota o Fuimaono i Lefagaoalii lava.

O le afioga i le gafatasi le afioga ia Vaipapa Mata’utia sa fa’afotutupu i ai lea suafa.

O le fa’afeagaiga ia Alesana Afamasaga Fatuvaili o le Ekalesia Faapotopotoga Kerisiano Samoa i Lefagaoalii sa ia fa’apaiaina lea fa’amoemoe fa’atasi ai ma le fesoasoani o fa’afeagaiga mai ekalesia a le Katoliko, A.O.G, Mamona ma le Metotisi i le Aso Faraile Aso 1 Iuni, 2018.

O le Aso To’ona’i sa faia ai le usu ale nu’u ma momoli atu ai le afioga i le Gafatasi le afioga a Fuimaono Vaipapa i luma o le nu’u fa’apea ma le itumalo.

I le fa’atalanoaga a Fuimaono ma le Samoa Observer sa ia ta’ua ai o le fa’amoemoe lava o lona tausiaina lea o lona aiga ma lona nuu.

“Sa matua’i fa’atumulia le afioaga o Lefagaoalii o le paia lava lea auā le afifio o sa’o e fa o le aiga Sa Peseta ma le mamalu o le Falefa o Samoa fa’apea le paia o le itumalo o Gagaifomauga #2.

“Mai lava i finao se’ia paia masina afiafi

“I le fa’afotutupu o le afioga i le gafatasi le afioga ia Fuimaono Vaipapa Mata’utia i le aso 2 Iuni 2018.

“Sa fa’atumulia i paolo ma gafa fa’apea aiga ma uo fa’apea suli ma feoi o le suafa Fuimaono.

“Sa molimauina lenei fa’amoemoe ua leva ona lupe, sa fau ao fau po, sa taumate fo’i pe taunu’u pe tua ma ni a.

Afioga le Gafatasi Fuimaono Vaipapa Mata’utia.
Afioga le Gafatasi Fuimaono Vaipapa Mata’utia.

“Ae fa’afetai i le alofa ma le agalelei o le tapa’au i le lagi ua fa’ataunu’uina ai ma le manuia lenei fa’amoemoe.”

Sa ta’ua e Fuimaono o lenei fa’amoemoe ua leva tausaga o taumafai mai.

“Sa taumafai mai lava i le tausaga e 2014 lenei fa’amoemoe sa iai ni fa’afitauli ae fa’afetai o lea ua mafai ona fa’ataunu’uina.

“O le fa’amoemoe maualuga lava ia i ai se tasi e na te ta’ita’iina le aiga ma le alofa.

“Ua leva tausaga o nonofo le aiga e leai se ta’ita’i na gata mai lava i le tausaga e 1961 ina ua maliu ai le afioga i le gafatasi ia Fuimaono Mitiana.

“Mai lava i lena taimi se’ia oo mai i le tausaga lenei lea fa’atoa toe maua se tasi e na te tausia le aiga.

“O le fa’amoemoe ia maua le nofo fealofani o le aiga.

“O le a ou tausia lo’u aiga ma le alofa ma o le a fa’alagolago i le Atua ina ia aumai le poto ma le atamai ma le loto alofa e tausi ai le aiga.

“O se fa’amanuiga lelei lea mo a’u ma e fa’afetai ai le Atua ona o ana fa’amanuiaga ia te a’u fo’i.”

© Samoa Observer 2016

Developed by Samoa Observer in Apia