O Tia o le Vavau i Mauna - Mai le Tusi o le “Suaga a le Vaatele”

10 August 2016, 12:00AM

O le afioaga lenei o lona atufalega o loo fausia faa-taamilo i luga o le gutu o se mauga-mu. O lona uiga-o se nuu e lapotopoto lelei, o lumā-mota ma laoa-e faataamilo ai foi le auala taavale.

O luma atu o le auala taavale e amata ai ona malifa malie aga’i i lalo ma o lea malifa faa-taamilo o loo faato’aina i faatoaga eseese e pei o fa’i, ulu, taamu, talo ma togā-fala aina. O le ogatotonu o le vaega malifa lea o le nuu- o loo i ai se Vai-‘eli lea o loo tua i ai tagata mo le vai taumafa. 

O Mauga- na ulua’i nofoia i le 1926- ma e na o le tasi le lotu i totonu o le nuu-ua na o le Ekalesia Katoliko. 

O le ulua’i Faife’au na galue i Mauga o Patele Kuma -ma o ia lea na taiulu i le ‘eliina o le vai-‘eli. Sa faalagolago tele Patele Kuma ma le faia o lenei galuega- ia Lopisone sa pule i Tuasivi- i taavale ma mea faigaluega-sa ‘eli ai le vaieli. 

Fai mai- i aso taitasi uma-e ta’ito’afa le ‘au-eli vaieli-e siligi i totonu o le vaieli mo le galuega-ona toe sisi a’e foi lea i luga i le afiafi. E tausaga atoa o fai pea lenei galuega-ona faatoa maua ai lea o le suavai. Ae peita’i-a o’o ina mugāla aso-ona sola lea o le suavai. O tuā-maota o Mauga- e soso’o ma le Lava lea e i le itu i gatai. 

I se talanoga faa-samasama-noa ma le Pulenuu o Vaifale-sa na faaalia ai -e leai se mea e igoa o le fia tausami i lo latou nuu, aua afai e tuai le gasesega a lona aiga, na te iloa mamao atu lava le aiga o loo talisua-ona savali loa lea i ai-ae toe foi mai- ua fetaui foi ma le tapenaga a lo latou aiga. O le pogai-e te iloa uma atu mea o loo tutupu i totonu o aiga ta’itasi-aua o se nuu lapotopoto ma e faatali’oli’o lona atu-falega.

O SAMALAEULU- O le afioaga lenei o loo i ai Malae Fono taua- e faapea na to’ai taunuu i ai mo le ulua’i taimi- misionare o le Ekalesia Katoliko i le aso 25 o Aokuso 1845. O igoa o ia malae fono o “Malaeola” ma “Gafoaga”-a o suafa o alii Pelepitelo sa lauiloa ai i Samoa nei o “Silipele ma Lutovi’o”-ia e faapea na malaga mai Uea i le vaa e igoa o le “Fetu o le Moana.” 

Na malaga mai ia Alii Pelepitelo ma se taule’ale’a Samoa-e faapea o le alo o Tuala Taetafe o Lealatele-ma o lona igoa o Ioakimo. Na malaga mai lea taule’ale’a ma Ali Pelepitelo ona e faapea- e tele ona aiga i Falealupo ma Safune-ma atonu o le a fesoasoani tele lea- i le galuega a Alii Pelepitelo. 

Sa muamua lava ona tuu-taula le Fetu o le Moana i Falealupo ma iloa ai-ua tupu ma ola le LMS-ma o le ala lea na teena ai le taunuu ane o le Ekalesia Katoliko. Ona toe folau lea o le ‘Fetu o le Moana’ i Safune-ae na toe teena foi. Ona ita ai lea o Ioakima ona o le teena so’o o le Lotu. 

Ona alu ai lea o le sopo a Ioakimo i Lealatele e logo Tuala ma Salā ma Lealatele atoa-o le a taunuu atu le Lotu fou.  Peitai-ua folau atu nei le Fetu o le Moana ua le alu i Lealatele-ae ua toe fo’i i Falealupo ma Safune-se’i toe taumafai tasi-e totŏ ai le fatu o le Talaiga fou. 

Ae o le itu e faanoanoa ai-sa toe teena foi le lotu e ia nuu e lua.  Ona folau atu ai lea o le Fetu o le Moana e aga i Sasa’e ma le faamoemoe e tuu-taula i Safotulafai. Ae paga lea-sa teena foi ona tu-laueleele le Lotu fou. 

Sa mautala le Toa o Salelavalu o Mamoe i le tala vale e uiga i le teena soo o le Lotu fou, ona fai ai lea o lana tonu ma lona aiga i le teena so’o le Lotu fou, ona fai ai lea o lana tonu ma lona aiga-ina ia faataga le Lotu fou e tu-laueleele. 

Peitai-e leai se aoga o lea faatagaga-ona e taunuu le avea’i ina ia tu-laueleele-ae ua leva ona folau atu le Fetu o le Moana i Lealatele lea o le a totŏ ai e o’o i le faavavau le fatu o le Tala’iga fou i Malaeola ma Gafoaga.

Fai ma na matua talitalia le taunuu atu o Alii Pelepitelo ma o sauniga lotu na soso’o ai-sa fai uma lava i le Maota o Tuala Taetafe! 

(E faaauau pea) 



10 August 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>