Ia taumafai e atia’e manupapalagi

Tusia Vatapuia Maiava ma Ilia L. Likou ,

98 Hits

Junior Tau, 46 le matua o le soifua o Letogo.

Junior Tau, 46 le matua o le soifua o Letogo.

“O le atina’e lenei o le lafu povi e matua’i faigofie lava e  fua lea i le lelei o le lauele’ele e i ai.” Le tamā i a Junior Tau, 46 le matua o le soifua o Letogo.

I le fa’atalatalanoaga ma le  Fofoga o Samoa ma Junior i le aso ananafi na ia fa’ailoa ai le tulaga o lo’o ua i ai nei le atina’e o le aiga.

“Ia o si a matou taumafaiga ia  na amata mai lava i nai povi e lima i le tolu tausaga talu ai.

“Na o matou fa’atauina mai ia o le taimi lenei ua 18 le aofa’iga o povi o lo’o ua o matou tausia nei.

“Ia o le galuega lea o lo’o fai nei o le ave o povi i le taeao i se laueleele o lo’o  tele ai le vao mo le fafagaina ia ona fa’apena lava lea ona fai i le aso atoa.

“O lo’u iloa i ai , ia e leai lava se itu e faigata ai, aua o le lelei fo’i ia o povi ia e malamalama lava pe a nanu i ai.

“Aua o manu na aumai mai Ausetalia.

Na ia fa’ailoa i le Fofoga o Samoa o le taimi lenei e leai se naunautaiga o lo latou aiga mo le fa’atauina o manu papalagi i se taimi lata mai.

“Ia o lea fuafua se’i atoa le 30 o povi ia ona va’avaai loa lea i lea tulaga ae o le taimi lenei ia o lea lava e tausi.

“E leai so matou manatu e vave fasi manupapalagi nei ma ave e fa’atau, o lo’o i ai lava le manatu se’i toeititi.

Na ia ta’ua na o latou fa’atauina mai povi i le taimi muamua i le afe talā i le povi e tasi.

“Ia e tele lava le tupe na fa’aalu ae ua alu alu ua va’ai atu ua fanafanau povi e pei o lea le itu ua una’ia ai lava i matou i le fa’atinoina o vaega nei.

“O lea fo’i matou te iloa e tupe tele e maua mai ai, ma e pei o lea lava le agaga o le taumafai ai i atina’e nei ina ia mafai pea ona atina’eina.

“O la’u ia lea fautuaga i le tele o i latou o lo’o silasila fo’i lafumanu, ia e le tau so’ona aumai ni povi se fia, na o le lua lava ni povi e amata ai.

“Ia e te’i lava le va’ai atu ua amata ona tele povi.

“O le itu pito sili ona taua, ia aua lava ne’i fiu gofie, aua e tele fa’afitauli ae o le taumafai ai pea fa’atino.

© Samoa Observer 2016

Developed by Samoa Observer in Apia