Leai se suavai
O se tulaga faigata tele o lo’o ua feagai ma le aiga o Onosai Galutino o Satuimalufilufi.
Na ia fa’ailoa i le Fofoga o Samoa ua savali nei ma le 19 tausaga e le’o mafai lava ona maua se fesoasoani mo lo latou aiga i le itu tau i le suavai ma le eletise.
O le tinā e 12 ona alo ma ua 47 nei le matua ole soifua.
“Ia o le taimi lenei mo le silafia e pei o lo’o fa’alagolago le suavai maua mo a’u ma le tausiga o le aiga i le vai timu, ia ma e fai fuafua uma lava mea uma e fua ile tala ole tau.
‘Aua a tele foi le fa’aaoga o le vai timu ia o le tele foi lea o le fa’aletonu e ono tula’i mai i lo matou aiga.
“E pei o le uiga o la’u tala, e fai mea uma ma le fuafua tatau lelei aua e leiloa pe mugala pe timuga lea aso mai lea aso.
Na ia ta’ua o lo’o ua i ai le tanevai a le aiga.
“E pei o lea le tulaga olo’o ua i ai nei si o matou aiga i le taimi lenei, afai lava ae leai se timu ia ua matuai leai lava se fa’amoemoe.
“Aua e mo le silafia e tele atu aso e mugala ai nai lo aso e timu ai Samoa.
“Ae po le a ma le a, e pei e mana’omia lava e si o matou aiga se vai aua le ola lelei o si o matou aiga i aso uma.
Na ia fa’ailoa o le tele o nisi o lo’o alala i lea vaega o le afio’aga olo’o afaina i lea tulaga.
“E pei o le eletise le isi tulaga faigata o lo’o feagai ai nei, e pau le tatalo olo’o ua va’ava’ai atu ai le taimi lenei o le maua lea ole avanoa mo le tele o vaega fa’atino o le aiga.
O le taimi lenei o lo’o ua taumafai lava e su’e se galuega e fesoasoani tele i si o latou aiga.
“Ia e pei o lea lava le tulaga olo’o ua va’ava’ai atu ai le taimi lenei, aua e o’o i si o’u to’alua e leai foi se galuega i le taimi lenei.