Ia tutusa tagata uma

Tusia Ioana Tupa'i ,

55 Hits

Linda Meli.

Linda Meli.

O lea le augani a Linda i le malo i le fa’atalatalanoaga ma le Fofoga o Samoa.

E pei ona faailoa e Linda Meli o se tasi lea o a’afiaga tele i lo latou soifuaga i le taimi nei e ui e le’o latou le mafua’aga.

O le faaletonu o auala ua avea lea ma se isi avega mamafa mo aiga o loo aumau i afioaga e pei o Nu’u ma Malie.

Sa ia faailoa le itu o loo aafia ai ona o le seleni faaaluina i le toe faaleleia lea o paú o le taavale.

“O le tulaga i auala ua matuai faaleagaina lava, fai lava si tetele o omoomo o loo iai ma e faaleagaina ai lava le taavale.”

“O le tele o aiga ua le nofonofoaí lava ae agai e tanu nei omoomo ona o le manumanu lava ia latou taavale.”

Sa taua foi e Linda e fa’afetaia ai ona o nei galuega fesoasoani ua faatino e aiga ua fesoasoani ai lea i le leaga o le auala ae peitai e le tumau ai e toe oo lava na le toe saogalemu mo femalagaiga.

“I le faamanatuina ai o le Kerisimasi seia oo mai lava i le tausaga nei ua sui faalua paú o le matou taavale ona ua faaleagaina ae ua faaopopoina ai foi i le taugata o le soifuaga.”

O le isi aafiaga tumau o loo feagai ma lea aiga o le tulaga i le eletise, “Ua tele talosaga sa tuuina atu i le malo e tauala atu lea i le malosiaga tau le eletise ae peitai e oo mai lava i le tausaga nei, leai lava se galuega ua tino mai.”

"E tele lava na faailoa mai o loo faatino a latou suesuega ma e leo toe mamao ona maua loa lea o le Eletise."

“Ou te talitonu e tatau ona tutusa uma tagata uma I auaunaga o loo ofoina mai e le malo ae lē faapito tu tasi le galuega.”

“O loo ave lava le faamuamua i aiga o loo tulata i le auala ae fa’atuatuana’i lava matou nei o loo aumau i tua nei.”

“E tatau ona tutusa uma faamanuiaga o loo maua e tagata lautele. 

“O le isi itu ua oó lava i le talosagaina o se paipa ina ia faapena ona faasoaina atu le suavai i nai o matou tuaoi o loo lē maua lea auaunaga ua tuuina mai le tali, e tatau ona matou onosai ma faatali.”

“E tatau ona tutusa uma tagata uma.”

© Samoa Observer 2016

Developed by Samoa Observer in Apia