E fa’atali lava le tupe maua i fua o le fa’atoaga
O le maua ai o le fa’atalatalanoaga le Fofoga o Samoa ma le tamā ia Sinaumea Toeava Saupo le aso ananafi fa’atoa malolo mai lana maumaga.
O le tamā e 65 tausaga le matua le soifua ma e to’a fitu si ana fanau o lo’o aumau uma i atunu’u i fafo.
“O a’u nei toa ou nofo ifo a i lalo e le atoa se lua minute,” o lana lea tala i le Fofoga o Samoa.
“O lea e su’e atu sa’u sikareti e ula ua leai se tupe."
“O le mea nei, fa’atoa maua lava le tupe pe a o’o na matua le fa’atoaga ma ave e fa’atau."
“Sei vagana ai le penisione lea e ola ai sei matua le maumaga."
“O a’u e to’a fitu la’u fanau o lo’o nonofo uma i fafo, ua ala ona ou o’o mai nei ina ua mama’i o’u matua."
“Ia ua uma soifua o nai o’u matua ae ua sau foi ma le musu ia e alu i fafo."
“O lea la ua matou nonofo ai nei ma si o’u tuafafine ma lana fanau."
Sa taua e le tamā o lona matua e le fa’atusatusaina i lona malosi.
“Ia e mo’i a ua matua tausaga ae oute malosi atu nai lo le tele tupulaga."
“O a’u o lo’o gafa nei ma le matou maumaga, e o uma tagata faigaluega ma aooga ae ou usu foi a’u le maumaga i taeao uma."
“O lo’o lelei lava mea uma i totonu si o matou aiga, e galulue fa’atasi aua le tausiga o le aiga."
“E ui foi e iai le fanau i fafo, ae ou te le fa’alagolago iai, ou te le mana’o foi e popole mai ia te a’u."
“Pei ona ou fai atu le taimi ua sola, o lea lava oute malosi e su’e a’u tupe ma tausi lava a’u ia."
Sa fesiligia le tamā i ni fa’afitauli ae sa ia tali o le fa’afitauli lava o le umi na fa’atali le taimi e matua ai le fa’atoaga e maua ai sina seleni."
“Pei na ou faiatu foi le taimi ua sola, e le’o iai lava ma se tupe le taimi nei, e lei leva ona toe toto atu le fa’atoaga, ia o lea lava e fa’atali le taimi e matua ai ma ave e fa’atau."
“O la’u iloa i ai e fa’atoa matua le mauamaga ia Aukuso ma o le taimi foi lena toa maua ai se seleni. E tai valu lava masina ma fua le fa’atoaga."
“Ia a leai lava le penisione lea e maua ai se seleni e le iai lava se tupe seivagana ua ave le maumaga e fa’atau."