Ua ose afi e le mate sauaga matagā. Aiseā?

11 June 2017, 12:00AM

O LE Atua e ona le mana ua ia faia ai mea silisili ua tatou fesilafa’I ai fa’afetai i Matagialalua nei, ae le ole fa’atulou ile lagi. Tulou, Tulou, Tulouna lava.  Afifio iā outou susuga I fa’amasino, fa’apea le komiti ole Samoa Ne’I Galo ma le mamalu  o Samoa ua aofia potopoto I le nei taeao matagofie.  Malō le soifua ma le lagi e mamā.

E!, le I’a mai moana ua le ta’a i taitafola ole vasa, ae ua ta’a le alofa i fanua lanulauava o Samoa lo’u atunu’u pele. Le i’a ua ta’a feai, ta’a sasau, ta’a le mafaufau ua fano ai fa’amoemoega tausili o tinā ma fanau. E! tafefe e, a’o leā ea le igoa o lenei i’a mai le moana? UA OSE AFI E LE MATE SAUAGA MATAGĀ. AISEA? Le i’a lea Samoa se’i filimatofi iai se manatu ole failauga mai le Kolisi I Sagaga. UA OSE AFI E LE MATE SAUAGA MATAGĀ. AISEA? Ole afi, ole malaia, e lē iloa alofa.

Samoa ua le ose tala fa’agogo lenei valea. Ua molimau lau vaai, molimau lau fa’afofoga. Ua sulufa’I fa’a-tagata-o-taua nai tinā ma fanau iti, ae maise nai fanau teine ile To’omaga. Aisea?

 

E talitonu le failauga, ua oneonea le fa’avae papa o Samoa. Ua tātu’u ele tele o aiga le LAAU OLE OLA.  Le lamepa ua leai se mea e tu ai i totonu o lotoifale o aiga, ua pogisa ai le alofa, ua mātūtū le ola fiafia. Tulou lau fa’afofogaaga Samoa, a’o le upu moni ua teletelenoa ma masaesae le afioga paia a le Atua i totonu ole tele o aiga kerisiano.  Ua taetae solo o ona lautusi fa’au’uina, lautusi e tupu ai le poto, lautusi ua mōmōga ai lagona ole loto fa’amagalo.  Lautusi e fuga sasala I le alofa, lautusi e tumu ile fa’aaloalo male va fealoaloa’i.

O tuleiga a lo tatou Ali’I fa’aola, “O A’U OLE VINE A’O LĀLĀ OUTOU” Le vine lea e lālā ile aiga, e lau ile aganu’u ole tatou tofa mai le Atua, e fua mai ile fa’aaloalo ma le va fealoa’i. E fua mai ile gagana tatou te mitamita ai. E tumu I le alofa, e lālā I lau tapuaiga e fua mai ile poto ma le mamalu o le Atua. E lau usiusi ile fa’a-le-agaga ma le tofā fetāla’i.

I totonu ole matou fale, e tumu i ata.  Ole ata osi o’u tinā i ona tautaliga iila ma ona laugutu sesena mūmū, ua aulelei i lana ‘ata.  O si a’u toeaina i lana ulafala ma lona lauulu selu momoe se’i tau nanā ai le kula o lona ulu. Ata o lo’u papatisoga, ata o lo’u aso fanau, o lo’u ata ina ua ou sili aoao I le matou vasega, ma le ata telē lava O Iesu Keriso i lona ofu sinasina ma ona a’ao manu’anu’a i sauaga matagā ole fa’aolataga. Olo’o tusia ai ma upu nei “O A’U OLE ALA, UPU MONI MA LE OLA”. Le vine lea ua paa’ā ona lau, ua pulaū ona fua. Ua mafati ona lālā, ua mago pala fa’amoemoega tausili, ua lelea mamao lau o miti ma saafi’afiga le taulau. Ua pepetuia fua ole agagnu’u, ua leai se va tapuia o fanau ma matua. Ua e fa’alālā mai lau aiā tatau, ua tatou lē fiafia e amo le atolaau a le Atua.

Ua molimau lau fa’afofoga , molimau lau vaai i ata fa’amomoi loto i fanau Suria ile tau manavanava, oi fa’aumiumi ma ō latou suālaumata ua gagana mai ile fiaola.  Samoa e fa’apena le o’ona, tigā matuitui o sauaga matagā. Ole mea e ofo ai le loto e fa’asā fa’a-va-o-malo kasa o’ona a’o lenei lava e pāpātetele le mafaufau pei ni manu sosogi leaga i Samoa. O afi, e le fa’atuaoiina le faleo’o ma le faletele, le mamoe ma le leoleo mamoe, le fai tikeri ma le polo lakapi. 

Ua ose afi e lēmate sauaga matagā. Aisea? Ua namu pala fa’avae papa ole alofa, ua mu totototo ai lau vaai ma gamu pologā ai lau tautala. Ua mu to’ito’I le lamepa ole malamalama o le alofa i totonu o lou aiga.  Ua ō’ō gaogao u’ū ma gamu oki lou tagata. O upu teu fatu, O SAMOA E FA’AVAEE I LE ATUA.o aiga Samoa e fa’avae i le Atua, o lou tagata ma lo’u tagata e tumu i le Alofa o le Atua.  Le fa’avae papa lea ua tu’I pomu fa’atonutonu e le ti’apolo, ua e sasa ai ile amo, sasa ile sapelu, sasa i feusuaiga matagā.  Le leo ua alaga, E! ta fia ola. E! ta le lavā pologa. E! matua’I e le alofa.  Daddy, daddy fa’amolemole ta fia ola.

Le ti’āpolo ole fuā, ti’āpolo ole onā fa’avalevalea ua e le fa’atuaoiina ai lou to’alua ma lou afafine. Le ti’āpolo o ou mata mu totototo i fuālaau fa’asaina ua fai ai tinā ma fanau o polotu’i e a’o ai lau fusu, a’o ai lau kiki, a’o ai lau kung fu.  O ata ea ia ua e valivali ai lou aiga? Le ti’āpolo ua le maua ai ni afiafi fa’a-le-aiga e molimauina ai e lelei le Atua I taimi uma. Ua ola fa’asevasevaloaina ai fanau , ua leiloa tusitusi, leiloa faitau tusi, ola fia ai solo, ola gaoi, ola fa’amisa, matamata i ata matagā ma namuia ai ta’inamu o aiga.  Samoa a lau fa’afofogaaga, o fa’ata’ita’iiga gamu leaga ia ua le mate ai sauaga matagā. Ua mātua I tagata ta’atua ua tupu tele ai le vaivai ma le valea.

O upu ole pese a fanau “a iai Iesu ise aiga ose aiga fiafia”, aiga manuia, aiga soifua malōlōina, aiga ola fa’aolaina, e fa’apaiaina le tautala, le va’ai ma le va tapuia..  Ua solipala le ava malosi ma fualaau fa’asaina.  Ua e sasa lou aiga I ana afioga paia, ua outou pepese I viiga ia outou afiafi fa’a-le-aiga.  Ua e fusiua ile mamalu o le Atua, ua tutoa le laau ole ola I totonu o lou aiga.  O fua lauusiusi ia ole vine ua fa’ailo lona manumalo a’ia’I e mate ai le afi o sauaga matagā.

Samoa lo’u atunu’u pele, tutu le lamepa lea (Ole afioga Paia)   Ole malamalama ole ala, ua fuga sasalai le loto fa’amaglo, le loto ua mōmōga ile alofa. Ole malamalama ole upu moni, o lana afioga le upu moni, o Iesu Keriso le upu moni, o lana tulafono le upu moni.  Ole malamalama ole ola ina ia anapopogi ai ta’ita’I ole atunu’u ma Samoa atoa se’I sasa mate le I’a lea mai le moana. Ae se’I totogo mai le ola fiafia, ola sa’oloto mai sauaga matagā.

 

E talitonu le failauga, o le isi lea mafuaaga ua le mate ai sauaga matagā. Aisea? Aisea Samoa?  Ua motumaea le tele o lotoifale o aiga mai le taula lea. O le Atua e ona le mana e mate ai sauaga matagā. O le Atua le e muamua, o le Atua e mulimuli, o le Atua nate faia mea silisili mo Samoa ma ona tagata.

 

 

MANUIA TELE LOU TUTO’ATASI SAMOA.

SOIFUA

 

O lenei  lauga e momoli atu ai alofaagamai le Kolisii Sagaga mo nai o’u uso ma tuagane aemaise bai tina olo’o ile To’omaga mo e puapuaga tia.

 

 

Failauga:  Talaitupu Palemia

Kolisi o Sagaga

11 June 2017, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>