Faamanatuina e Manono le Tutoatasi

Tusia Deidre Fanene ,

103 Hits

Faafiafiaga Faasamoa.

Faafiafiaga Faasamoa.

A’o faailogaina e le atunuu le atoaga o le 56 talu ona tuto’atasi Samoa o le autalavaou Metotisi a le afioaga o Manono sa faapea ona foi a latou faafiafiaga e faamanatu ai le tutoatasi o Samoa.

Sa ta’ua e le faafeagaiga ia Faleiva o le faamoemoe ua lua ai nei tausaga talu ona faia.

“O le tausaga muamua lava sa faapea ona faatinoina lava ae na o le sisiina lava o le fu’a ma fai taaloga.

“Ao le tausaga lenei o lea ua a’e ai se tofa ina ia matou lagolagoina le faamoemoe o le atunuu lea la sa matou faatinoina ai nisi vaega taua e pei o le toe fafaguina mai o measina a Samoa e pei o le lalagaina o le pola sisi ma le pola vai.

“E aofia ai le lalagaina o le ietoga ma le faiga o meataumafa Samoa.

“Ona o le tele o le tupulaga i le taimi lenei e sao o Samoa ao le isi talavou e leiloa le faatinoina o nei measina.

“O lea la ua tonu ai ina ia toe fafagu mai le faatinoina o measina nei.

“O le faamoemoe i le aso lea sa amatalia i faaaliga taavale teuteuina, faapea ai ma se savali sa faatautaia ma faafiafiaga ae mulimuli lava i mea ia sa ou taua muamua atu.

Fa'amanatuina ole Tuto'atasi o Samoa i Manono
Fa'amanatuina ole Tuto'atasi o Samoa i Manono
Fa'amanatuina ole Tuto'atasi o Samoa i Manono
Fa'amanatuina ole Tuto'atasi o Samoa i Manono
Fa'amanatuina ole Tuto'atasi o Samoa i Manono
Fa'amanatuina ole Tuto'atasi o Samoa i Manono

“O le auga lava ma le faamoemoe o le aso o le faafetaia lea o le Atua ona o lana tausiga ia Samoa atoa.

Sa taua foi e se tasi o tina Vaifua Alaivaa le tele o suiga ua iai aso nei pe a faatusatusa atu I aso ua tuanai pe a faamanatu le tutoatasi o Samoa.

“O aso la sa mafai e tina ma tama matutua ona sisiva I taimi o faafiafiaga.

“Ma e ese foi le onomea o latou pe a oo I taimi o faafiafiaga e ta te vaai ai I le sagisagi fiafia ma le mimita o le toeina ma le loomatua pe a oo i le taimi e fai ai faafiafiaga Samoa.

“Ao aso nei e pei ua fai lava e le tupulaga talavou faafiafiaga.

“O le isi itu o aso ia e pei e na o le pau lava lea o le aso e mafai ai e nisi ona oo i Apia pe a fai aso faamanatu aemaise lava nai tagata e le gata i Savaii ae faapea foi matou ia e tua nei.

“Ae o le agaga lava ia o le loto faafetai i le Atua ma manatua ai nai tatou tuaa ua lagomau mai i ti’asa sa faapea ona tutu malosi ina ia tatou saoloto.”

© Samoa Observer 2016

Developed by Samoa Observer in Apia