Galue pea tusa pe faigata le olaga

By Sarafina Sanerivi 11 December 2016, 12:00AM

E felanulanua’i lava manatu ma finagalo o le atunu’u e tusa ai ma le olaga ua iai i lenei vaitau. 

O nisi ua manatu e sili atu le olaga i nu’u i tua nai lo’o le taulaga, ona o le to’afilemu ma le saogalemu.

E to’atele foi ua ioeina lea manatu. 

E fa’apena foi le finagalo o le taule’ale’a ia Timo Vai, e 22 tausaga mai le afioaga o Nono’a i Saleimoa. 

Ae peita’i, na ta’ua e Timo, e mo’i lava o iai le to’afilemu i nu’u i tua, e le’o asa lava ma fa’afitauli o lo’o feagai pea ma nisi o aiga. 

“E pei ona e tau mai i lenei taeao, o lo’o tau fa’asua atu paelo vai auā foi feau masani o le aso. O lo’o iai le vai i totonu o le matou nu’u ma maua suavai lelei.

“Ae peita’i o si o matou aiga, na tipi la matou paipa ona telē le pili ae o lea la e tau togitogi le pili o le paipa.

“O le taimi la lenei o lo’o taumafai si o matou aiga ina ia tausa’ilia se auala e maua ai se tupe e totogi fa’auma ai le pili ina ia mafai ona toe oo atu le vai i si o matou aiga.”

Na ta’ua foi e Timo, o lana fe’au masani lava lea i le taimi nei, o le la’uina mai lea o le vai mai le vaipuna o le nu’u mo si o latou aiga.

O le isi fa’afitauli na ta’ua e Timo o le lē lelei lea o le auala o lo’o alu i uta i so latou alalafaga.

“O lea e fa’atali la matou talosaga sa ave ina ia fa’aleleia auala i si o matou nu’u.

“O le ala foi lea e le’o oo mai ai ni pasi i tua iinei, ona e le’o lelei le tulaga i le auala i le taimi nei.”

Peita’i na ta’ua e Timo, e ui lava i ia fa’afitauli, o lo’o manaia lava le olaga i nu’u i tua ona o lo’o mamalu ai pulega a matai ma faipule. 

“Na pau lava le fe’au masani a i latou ua tausi aiga ma tautuaina aiga o le va’ai lelei lea o aiga ma tautua le nu’u.

“E filemu foi le olaga i tua inei ona o le fa’amalumalu ai o pulega a ali’i ma faipule.

“E pei o lava o Apia o lo’o tele vave ai le suiga o le olaga i nei vaitau. A’o iinei ia, o lo’o sologa lelei lava mea uma, se’i vagana ai nai fa’afitauli laiti na e pei ona ta’ua.”

Na ta’ua foi e Timo, o le taua o le fa’amalumalu ai o pulega a nu’u ma matai i totonu o nu’u ma alalafaga ta’itasi, o le fa’atonutonuina lea o amioaga a le tupulaga. 

“O le pule a matai o lo’o limata’ita’iina ai amioga a matou nei le tupulaga aemaise o le fanau.

“O matou e tua iai le fa’autautaga a matai o le nu’u, auāo matou lea ua fa’alupeina o le malosi o le nu’u.

“Matou te galulue fo’i la auā o le upu lava a le atunu’u, o le ala i le pule o le tautua. A lelei la ona tautua aiga ma le nu’u, o le a manuia foi i matou.”

By Sarafina Sanerivi 11 December 2016, 12:00AM
Samoa Observer

Upgrade to Premium

Subscribe to
Samoa Observer Online

Enjoy unlimited access to all our articles on any device + free trial to e-Edition. You can cancel anytime.

>