Ripotia e PaiMulitalo Ale

Fa’aliliu e Maiava

O le tele o faitioga ua faia nei ona o le tele o pisinisi ma faleoloa fou o tagata-Saina ua i Samoa nei, na ta’ua e se Ali’i FaiPisinisi mai Saina, e le fa’avaea ia faitioga.

Na fa’ailoa e le pule o le Supamaketi o le Princessa i le Samoa Observer ananafi, o Samoa ua avea nei ma ona atunu’u ma ua matua fiafia ai lava e fai so latou sao mo le atina’eina o le tamaoaiga o le atunu’u.  

Saunoa Chen, ua silia i le 17 tausaga talu ona nonofo ona matua i Samoa nei ma o le taimi nei, ua fa’aipoipo atu i se tausala Samoa, ua to’alua lana fanau ma o lona atunu’u lava lenei.

“Fiafia kele a’u Samoa, magaia kako akugu’u,” o lana fa’aaliga lea ma ‘ata’ata.

“Filemu kele leai vevesi, magaia leai kaua…misa…faga… ioe, akugu’u uma kakou.

“Koe fo’i a’u Saiga lumaga’i, kasi a’u su’e pemika alu ai. Kele pepa kakau ga fai. Lea gofo mau makou Samoa, leai sesi akugu’u koe o ai makou.” 

Na laga’ia le finagalo o Chen talu ai le tele o fa’asea a’o popolega fo’i na fa’ailoa e le tina-faipisinisi o Moe Lei Sam, lea na ta’ua, ua fa’apopoleina ai i le lumana’i o tagata Samoa ma ta’ua ai fo’i le tele o  pisinisi a tagata-Samoa ua matua afaina ona o le lolofi mai i fanua o ‘Saina fou’ ma a latou pisinisi.

“E o-mai lava ma ‘aumai a latou tagata, a latou tagata-faigaluega,” o lana fa’aaliga lea. 

Ae na saunoa Chen , e le moni lea lafoga. 

Fai mai Chen, o le 95 pasene o tagata faigaluega i lona faleoloa, o tagata-Samoa. O le to’atele lava o faiPisinisi mai Saina ua i le atunu’u, o le to’atele o tagata-faigaluega, o tagata Samoa. 

“Pau lea Saiga faleoloa a’u, aiga a a’u,” o lana fa’aaliga lea.

“Leai kele kupe-mama maua, pau lea fiafia makou galue… iloa uma aufaigaluega.”  

Na fa’aopopo mai Chen, e moni o faleoloa o pisinisi mo latou, a o le mea moni lea naunau iai, o le fia fesoasoani mo tagata-Samoa.

“Tau fo’i oloa matou kele kaugofie mo maga’o kagaka Samoa ona leai kele kupe maua kokogi,” o lana fa’aaliga lea. 

Na ia te’ena fo’i se fa’amatalaga fa’apea, o lo’o manuia a latou pisinisi ma tele tupe-mama e maua, latou te toe lafo  atu i Saina.

“Leai  ‘oka oloa makou mai fafo, ioe, fakau mea uma Samoa gei,” o lana fa’apulapula mai lea o le mea o lo’o vavao ai nisi. “Leai kele kupe-mama maua makou.  Kaumafai kele makou fa’akaugofie oloa mo kakou. 

“Kele kagaka Samoa le-lava kokogi galuega. A kaugaka la oloa, pau lea leai kupe keu mo lakou.” 

Na ta’ua e Chen, mo ia ma lona aiga, e le o le taumafai e fa’atauva. Fai mai, o lana pisinisi, o se fesoasoani mo tagata-Samoa.

“Fakau fuala’au fai-sua …kapisi pi mea uma…mai makeki kakou maua kupe vave mo Samoa,” o lana fa’aaliga lea. “Kele oloa makou fakau fo’i mai keige lea Lei Sam. Kele aumai oloa lakou faleoloa a’u, fa’akau makou.” 

E tautua lava si ali’i o Chen, i le tausia lelei ma le va’aiga o lana ‘aufaigaluega. O se fa’ata’ita’iga, e saunia taumafa mo le aso atoa ma e mautinoa fo’i e taumamafa, a’o le’i manava ma aga’i i aiga. 

E fa’ataga fo’i e le ali’i-pule le ‘aufaigaluega e faia ‘aitalafu ae to’esea mai o latou totogi i le fa’ai’uga o vaiaso ta’itasi.

“Pau lea mana’o a’u tupe mo mea’ai. Pau ga. Ke iloa mafuaga, leiloa fea ave iai kupe, ua Samoa uma a’u makua, ko’alua a’u ma le aiga, ioe… i’igei uma… leai gisi kokoe Saiga.  Ioe, gu’u uma kakou”.

O le pisinisi a Chen, le Princessa Supermaket, e lima ona lala i Samoa nei,  i Tanugamanono, Faleapuna, Moto’otua, Vaimea ma Si’usega.